Skuadra lituaneze Raudondvaris Hoptrans ka fituar edicionin e sivjetshëm të turneut FIBA 3×3 Challenger Prishtina 2025, i cili u mbajt për dy ditë radhazi në kryeqytetin e Kosovës.
Në një atmosferë sportive dhe festive, pas shumë ndeshjeve të zhvilluara me intensitet të lartë, Raudondvaris Hoptrans triumfoi në finale ndaj skuadrës Valencia, me rezultatin përfundimtar 21:12.
Lojtari Aurelijus Pukelis u shpall MVP i turneut për performancën e tij gjatë gjithë garës.
Mundesh me e lexu edhe…
Përveç fituesit dhe finalistëve, edhe skuadra e vendit të tretë siguroi kualifikimin për World Tour Lausanne, që do të mbahet më 15-16 gusht, si pjesë e kalendarit të FIBA 3×3 World Tour 2025.
Skuadrat fituese u shpërblyen edhe financiarisht: vendi i parë mori 20 mijë euro, i dyti 15 mijë, i treti 11 mijë, i katërti 8 mijë, ndërsa vendi i pestë 6 mijë euro.
Turneu u organizua nga Prishtina 3×3, me përkrahjen e Federatës së Basketbollit të Kosovës, duke ofruar dy ditë me basketboll 3×3, muzikë, aktivitete dhe shpërblime për publikun e shumtë që ndoqi nga afër këtë ngjarje në fundjavë./Katror.info
