Fakulteti i Arkitekturës në Universitetin e Prishtinës ka shënuar një sukses të jashtëzakonshëm në arenën ndërkombëtare, duke u renditur në Top 10 institucionet më të mira në botë në fushën e arkitekturës, shkruan Katror.info.
Studentët e këtij fakulteti janë shpërblyer me vendin e parë në edicionin e 9-të të konkursit prestigjioz Inspireli Awards 2024, një prej garave më të mëdha globale për studentë të arkitekturës dhe dizajnit.
Projekti fitues, me titull “Sustainable Village – ECOUNITY”, u realizua nga studentët Sibora Ramadani, Eron Shala, Bleranda Hykosmoni dhe Albina Zenunaj, nën mentorimin e profesoreshës Asistente Rozafa Basha. Ky projekt reflekton një qasje inovative dhe të qëndrueshme ndaj arkitekturës së fshatit, duke u vlerësuar lartë nga juria ndërkombëtare për kreativitetin, funksionalitetin dhe ndikimin e tij social e mjedisor.
Mundesh me e lexu edhe…
Ky sukses jo vetëm që nderon autorët e projektit, por përfaqëson një moment historik për Fakultetin e Arkitekturës dhe për Universitetin e Prishtinës në përgjithësi. Renditja në mesin e 10 universiteteve më të mira në botë është dëshmi e cilësisë së arsimit dhe përkushtimit të studentëve e stafit akademik.
Në kuadër të ceremonisë së ndarjes së çmimit, studentët patën gjithashtu privilegjin të marrin pjesë në hapjen solemne të Muzeut të Schindler-it, një ngjarje me rëndësi të thellë historike dhe simbolike. Kjo përvojë e jashtëzakonshme i ka bërë pjesë të një rrëfimi më të madh – atij të kujtesës, humanizmit dhe shpresës që brezi i ri i arkitektëve mund të kontribuojë pozitivisht në ndërtimin e një bote më të drejtë dhe më të qëndrueshme./Katror.info
