Tenori nga Kosova, Granit Musliu, është përzgjedhur të marrë pjesë në garën e madhe ndërkombëtare operistike “Operalia” 2025, themeluar nga tenori legjendar, Plácido Domingo.
Lajmin e ka bërë të ditur vetë Musliu në një intervistë për Radio Kosova 2, ku ndau emocionet dhe rëndësinë që ka ky hap për karrierën e tij artistike.
“Gjithmonë kam ëndërruar të jem pjesë e kësaj gare, sepse të këndosh nën përcjelljen e Plácido Domingo është një nder i madh. E konsideroj privilegj të jashtëzakonshëm të kem mundësinë të prezantoj veten dhe njëkohësisht edhe vendin tim, Kosovën. Është një ëndërr që po bëhet realitet – një ëndërr që besoj e ka çdo tenor të marrë pjesë në këtë garë ku ka aplikime nga mbi 500 tenorë nga e gjithë bota”, – u shpreh Musliu.
Mundesh me e lexu edhe…
Aktualisht, Graniti është pjesë rezidente e Shtëpisë Operistike Shtetërore në Munih, ku po korr suksese të vazhdueshme. Ai tregoi edhe për angazhimet artistike të këtij sezoni dhe planet për të ardhmen:
“Këtë sezon pata debutimin tim të madh në rolin e Kassios në operën “Otello” të Verdit – një përvojë që u prit me ovacione nga publiku. Kam pasur edhe disa debutime të tjera në Munih. Për sezonin e ardhshëm ende nuk është publikuar kalendari i plotë, por deri më tani kam të konfirmuar dy debutime të rëndësishme – në Teatrin e Operës në Lozanë dhe në Operën Shtetërore të Kopenhagës. Do të kem gjithashtu paraqitje edhe në Hamburg, përveç disa projekteve të tjera të mëdha që janë në planifikim. Një tjetër gëzim i madh është rikthimi në Kosovë këtë vit për një koncert special në njërin prej festivaleve tona”, – deklaroi ai.
Granit Musliu, i lindur në Mitrovicë dhe që prej katër vitesh vepron në Gjermani, u bëri thirrje të rinjve të talentuar nga Kosova të ndjekin ëndrrat e tyre, pa u ndalur përballë sfidave:
“Edhe për mua, kjo rrugë dikur dukej e pamundur. Por po ju them se puna asnjëherë nuk duhet të ndalet e motivi pastaj vjen vetë, sepse kur e do një gjë, rrugën e gjen vetë. Vetëm duhet përkushtim e shumë punë“, përfundoi Musliu.
“Operalia”, gara e themeluar në vitin 1997 nga Plácido Domingo, mbahet këtë vit në Bukuresht në tetor të 2025. Qëllimi i saj është të zbulojë dhe promovojë talentet më të mëdha të reja në botën e operës. Ndryshe, Kosova ka një histori të suksesshme në këtë kompeticion – në vitin 2016, tenori Ramë Lahaj fitoi vendin e tretë në kategorinë e meshkujve, çmim që iu dorëzua personalisht nga Domingo./RTK/Katror.info
