Një libër i veçantë pritet të botohet së shpejti në Prishtinë dhe Tiranë. Yll Rugova, dizajner informacioni dhe tipograf e boton librin “Tipografia shqiptare 1555-1912” në muajin tetor.
Vëllimi nga Yll Rugova trajton historinë e botimeve në gjuhën shqipe, çështjet që lidhen me shtypshkronjat në viset e banuara me shqiptarë dhe punën e shtypshkruesve shqiptarë përgjatë periudhës së kërkuar.
Qysh e thotë vetë Rugova dy vjet izolim të COVID-19 kanë liruar hapësirë për një hulumtim të veçantë mbi historinë e shkronjave, shtypshkronjave e botimeve shqiptare.
Mundesh me e lexu edhe…
“Histori që mbase fillon edhe para botimit të Mesharit në vitin 1555, me inkunabulat e familjes Vitali, e që na është dashur ta ndërpresim më 1912 kur numri i shtypshkronjave dhe shtypshkronjësve shqiptar shumëfishohet.”
- Advertisement -
Ky studim trajton historinë e veprimtarisë tipografike, shtypshkruese dhe grafike ndër shqiptarë, nga viti 1555, kur njohim shtypjen e parë në shqip e deri në vitin 1912 — me krijimin e shtetit të pavarur shqiptar.
Periudha pas vitit 1886 ka një dendësi të theksuar të aktivitetit shtypshkrues dhe të realizimit grafik në përgjithësi.
- Advertisement -
Përmbledhja u kushtohet në rradhë të parë studiuesve të dizajnit grafik dhe tipografëve, por gjithsesi edhe bibliografëve, arkivistëve, historianëve e albanologëve. Sa i përket të dhënave arkivore, autori ka hulumtuar veçanërisht nëpër materialet e Arkivit Qendror të Shtetit në Tiranë, dosjet Partheni, Lef Nosi, Theodhor Haxhifilipi, Simon Kazanxhiu, Kostantin Kristoforidhi, Kristo Luarasi dhe Gjergj Pekmezi.
Në libër diskutohet, përveç tjerash, për germat rotunda të Nichola Jensonit që përdoren te Meshari, për tipshkronjat e Alois Auerit të alfabeteve origjinale shqipe të Todhrit e të Veqilharxhit në mesin e shekullit të 19të, për gdhendjen në çelik të alfabetit të Stambollit nga vetë Sami Frashëri, e për shtypshkronjën prodhimtare të Kristo Luarasit.
Kërkimi trajton të gjitha shtypshkronjat a shtypshkronjësit që kanë vepruar në viset shqiptare, e të gjithë librat në gjuhën shqipe nga kjo periudhë.
Promovimi do të mbahet më datë 2 tetor në Prishtinë, në Defy Them / Qendrën për Kulturë Alternative, në orën 14:00.
Pak ditë më parë libri është botuar në formatin e-book nga shtëpia botuese Berk në Tiranë. Ndërkohë, më 6 tetor libri do të promovohet edhe në Tiranë te Berk, ora 17:00.
Përgatiti:
Albana Isufi Jashanica
- Advertisement -
