Me buxhet të shtetit të Shqipërisë do të përkrahen tri projekte kinematografike nga Kosova.
Këshilli Miratues i Projekteve të Filmit Artistik i Qendrës Kombëtare të Kinematografisë të Shqipërisë ka shqyrtuar gjashtë projekte filmike të kategorisë “bashkëprodhim në pakicë”. Gjysma prej tyre janë projekte autorësh nga Kosova dhe të tria kanë marrë mbështetje. Bëhet fjalë për “Jerëm” me skenar dhe regji të Ismet Sijarinës, producent në pakicë “Tunnelfilm”, “Kthimi n’mal” me skenar dhe regji të Antoneta Kastratit, producent në pakicë “Artalb Film Productions” dhe “Lindur për të jetuar”, me skenar të Arlinda Morinës, nën regji të Kastriot Avdylit, producent në pakicë “Action Production”.
Në listë ishin edhe “Gjenerali dhe Flutura” me skenar të Venko Andonovski nën regji të Antonio Mitrikeski, producent në pakicë “Bunker Film+”, “Liqeni” me skenar dhe regji të Nikos Ziogas, producent në pakicë “Art Film”, “She Sees”, me skenar dhe regji të Memi Koupa, producent në pakicë “Ska-ndal”.
“Bashkëprodhim në pakicë” konsiderohet mbështetje e projektit filmik me buxhet të vogël. Projekti “Jerëm” do të mbështetet me rreth 45 mijë euro, “Kthimi n’mal” 35 mijë dhe “Lindur për të jetuar”, 30 mijë euro. Këshilli Miratues i Projekteve ka pasur në përbërje regjisorin e shquar nga Kosova Isa Qosja (kryetar) dhe anëtarët Agim Poçari, Ben Andoni, Fatos Berisha dhe Gentian Zenelaj (anëtarë). Ky Këshill i propozoi kryetarit të Qendrës Kombëtare të Kinematografisë, Eol Çashkut përkrahjen e tri projekteve.
Mundesh me e lexu edhe…
Ndryshe, Kosova ka hise si bashkëprodhuese edhe në kandidatin e sivjetmë të Shqipërisë për çmimin “Oscar”. Është filmi “Pikë uji”, trileri, nën regji të Robert Budinës, që në ekip ka edhe Gresa Pallaskën në rolin kryesor, tok me Arben Bajraktarajn, si dhe Doruntina Bashën si bashkëskenariste. Ka qenë i vetmi kandidat përderisa në Tiranë, ku është pritur mirë nga publiku e kritika dhe është veçuar loja e Pallaskës. Kosova ka dështuar sivjet që të nxjerrë një kandidat. Qendra Kinematografike e Kosovës s’ka hapur fare thirrje dhe nuk ka dalë ende me ndonjë qëndrim./Katror.info
Përgatiti:
