Tripadvisor shpall destinacionin më të mirë të ushqimit në botë

Kryeqyteti italian Roma u emërua destinacioni më i mirë në botë për ushqimin sipas platformës së njohur të udhëtimit Tripadvisor

Ndërsa Roma këtë vit feston Jubileun – duke pritur të tërheqë mbi 35 milionë vizitorë – Qyteti i Përjetshëm ka qenë prej kohësh një strehë e preferuar për adhuruesit e ushqimit.

Planifikoni një udhëtim për ta shijuar vetë këtë vit. Për pica, qëndroni në radhë në Roscioli al Forno, ku pica e trashë al taglio (me feta) ofrohet me një sërë produktesh sezonale, shkruan shqip.al.

Për pica klasike, drejtohuni mbi lumin Tiber në L’Elementare di Trastevere, ku picat e stilit romak me kore të hollë dalin pak të djegura nga furrat me dru.

Për sa i përket makaronave, opsionet janë të pafundme. Salumeria Roscioli, një restorant hibrid, shërben karbonarën më të mirë të qytetit, të bërë me guanciale dhe pecorino romano.

Armando al Pantheon, një restorant familjar (trattoria), disa hapa larg monumentit antik, është i njohur për makaronat cacio e pepe gjithmonë perfekte dhe prodhime të tjera romake.

Në Imàgo, në majë të hotelit ikonik Hassler, provoni gatimin bashkëkohor italian të shefit të kuzhinës Andrea Antonini me pamje mahnitëse të qytetit.

Ose rezervoni një tavolinë në La Pergola, restoranti i vetëm i Romës me tre yje Michelin i ndodhur në Cavalieri Waldorf Astoria.

Akulloret meritojnë itinerar të veçantë dhe Gelato del Teatro, që prodhon shije novatore si bajame siciliane dhe sherebelë e mjedër, duhet të jetë ndalesa e parë. Gjithashtu shtoni Otaleg dhe Fatamorgana në listë.

Përtej pikave më të njohura, gjeni edhe xhevahire ushqimore në disa vende të papritura.

Chiostro del Bramante, një kafene e qetë që shërben kapuçino dhe ëmbëlsira, është vetëm disa hapa nga Piazza Navona.

Fuqia e ushqimit si një motivues udhëtimi nuk ka qenë kurrë më e fortë.

Sipas Indeksit më të fundit Sezonal të Udhëtimit të Tripadvisor, 60 % e udhëtarëve globalë përmendin përvojat kulinare, si aktivitetin e tyre më të dëshiruar gjatë udhëtimit.

Dhe për ata udhëtarë, kryeqyteti italian është një destinacion veçanërisht emocionues – të gjitha rrugët të çojnë në Romë, veçanërisht për adhuruesit e ushqimit. /Katror.info