Agjencia e Statistikave të Kosovës (ASK) ka publikuar Statistikat e Hotelerisë dhe Turizmit për vitin 2024, duke theksuar një rritje të konsiderueshme të vizitorëve në vend krahasuar me vitin paraprak, shkruan Katror.info.
Sipas raportit zyrtar, gjatë vitit 2024, në Kosovë janë regjistruar gjithsej 698.068 vizitorë, nga të cilët 39.3% ishin vendorë, ndërsa 60.6% ishin vizitorë të huaj. Kjo paraqet një rritje prej 18.3% të vizitorëve të jashtëm në krahasim me vitin 2023.
Numri i net-qëndrimeve gjithsej ka arritur në 1.522.890, me një pjesëmarrje më të madhe nga vizitorët e huaj (54.3%), çka nënvizon interesimin në rritje për turizmin në vend.
Në aspektin rajonal, Rajoni i Prishtinës ka regjistruar numrin më të madh të vizitorëve vendorë me 205.405 persona, ndërsa Rajoni i Pejës ka pasur numrin më të lartë të net-qëndrimeve, duke arritur në 591.673, çka tregon për atraktivitetin e kësaj zone për qëndrime më të gjata.
Sipas ASK-së, vizitorët e huaj kanë ardhur kryesisht nga Shqipëria, Gjermania, Zvicra dhe Turqia, vende me të cilat Kosova ka lidhje të forta kulturore dhe diasporike.
Gjithashtu, gjatë periudhës janar–dhjetor 2024, nga pikat kufitare janë regjistruar gjithsej 6.938.227 hyrje të vizitorëve të huaj në territorin e Republikës së Kosovës.
Për qytetarët e Kosovës, ASK bën të ditur se 484.949 persona kanë realizuar të paktën një udhëtim me net-qëndrim gjatë vitit 2024, brenda ose jashtë vendit.
Agjencia thekson se të dhënat janë grumbulluar përmes raportimeve të rregullta të pikave kufitare dhe subjekteve hotelierike, duke përfaqësuar një tregues të rëndësishëm për zhvillimin e turizmit në vend./Katror.info
