Turizmi në Shqipëri ka marrë hovin më të madh për shkak të atraksionit të lartë që sjell gjatë sezonit veror. Por një trend në rritje i vizitorëve gjatë dimrit, është i pamohueshëm.
Në kohë, Shqipëria i ka rritur pritshmëritë e saja turistike dhe vetëm vitin e kaluar, kapi shifrën e 11.7 milionë vizitorëve të huaj – një rekord, i cili zëvendëson atë të vitit 2023, me 10.1 milionë.
Shumëkush mund të mendojë se rritja e angazhimit në media sociale, shfaqja gjithnjë e më e madhe e Shqipërisë si një xhevahir në mes të Evropës, çmimet e konkurrueshme, por edhe fjalët gojë pas goje të turistëve që e kanë vizituar, kanë bërë që ajo të ecë.
Mundesh me e lexu edhe…
Ajo që shumëkush nuk mënon megjithatë, është fakti se në Shqipëri, përveç turizmit veror, po rritet tej mase edhe ai përgjatë pjesës tjetër të vitit, posaçërisht dimëror.
Reflektimi vjen edhe në shifra, në dy muajt e parë të vitit, ku ka pasur rritje sërish të turizmit, por ku në sy bie veçanërisht fakti se Evropa Qendrore po dyndet më shumë drejt Shqipërisë edhe në muajt e ftohtë.
Sipas të dhënave që janë përpunuar nga Instat për periudhën janar-shkurt 2025, bie në sy për shembull fakti se vizitorët nga Lituania janë rritur me thuajse 390%. Po ashtu edhe ata sllovakë me thuajse 112%, hungarezë 69%, çekë me 61%, apo austriakë me thuajse 59%.
Surprizë janë edhe vizitorët nga India, të cilët janë rritur me 268%. Ndërsa, me një linjë ajrore direkte të dedikuar tashmë, janë parë edhe frytet e ardhjes së turistëve nga Izraeli, të cilët janë rritur me 75%.
Këto të dhëna janë edhe një reflektues i qartë se pse investimet më të mëdha të së ardhmes në aspektin infrastrukturor në Shqipëri, do të bazohen te zhvillimi i një turizmi malor elitar, kryesisht përmes rrugëve hekurudhore, por jo vetëm.
Një program 9-vjeçar ambicioz, i cili synon që Shqipërinë të mos e vendosë në radarët e botës vetëm për plazhet e bukura, por edhe për pjesën e turizmit, e cila kërkon infrastrukturë, për të joshur.
E ka prezantuar kryeministri Edi Rama nën moton “Infrastruktura 2030”, pjesë e planit të tij elektoral “Shqipëria 2030”.
Bëhet fjalë për një strategji përtej një mandati të katërt të socialistëve. Të një plani, i cili synon që në sytë e turistëve të mos jetë vetëm pjesa lindore e vendit, por edhe ajo perëndimore dhe për ta bërë Shqipërinë, për të perifrazuar kryeministrin, “një Zvicër ose Austri të Ballkanit Perëndimor”.
Nuk bëhet fjalë për nivelin e jetesës, saktëson ai, por për të pasur një infrastrukturë të tillë, e cila josh pa masë dikë që do të shohë në pak ditë peizazhet e jashtëzakonshme malore që Shqipëria paraqet si një kartolinë, me rivierën dhe plazhet e mrekullueshme ranore, që kanë gjetur vëmendjen ndërkombëtare.
Por, si do të synohet të bëhet kjo?
Fillimisht, me shumë financime. Çelësi për këtë është aderimi në Bashkimin Evropian.
Aktualisht Shqipëria ka investuar një sasi të konsiderueshme fondesh, por shumica prej tyre janë në formë kredie nga BE-ja. Ndryshimi rrënjësor – nëse Shqipëria pranohet shpejt në Union – është fakti se shumëfish më shumë fonde do të vijnë dhe masa më e madhe prej tyre, do të jenë grante.
Plani i financimit të BE-së për Ballkanin Perëndimor është vetëm fillimi, pasi ai me të vërtetë mund të vendosë në vijë punët dhe Shqipëria ka lëvruar deri tani më së shumti fonde dhe kjo ka ardhur për faktin se është një vend që ka kryer detyrat dhe ka bindur BE-në të shkrijë fondet e dhëna si premtim në kohën e duhur.
Synimi i këtyre fondeve është të investohet në infrastrukturë, kryesisht atë hekurudhore, por edhe në atë të rrugëve.
Kjo gjë do të bëjë që ndërlidhja mes pjesëve lindore dhe atyre perëndimore të vendit të jetë shumë më e lehtë.
Hekurudhat për shembull do të jenë me rëndësi të lartë. Ajo Tiranë-Rinas-Durrës është vetëm fillimi, pasi është një zanafillë e ndërlidhjes së kryeqytetit me aeroportin dhe me portin, që do t’i hapë më pas rrugë të tjerave.
Vorë-Hani i Hotit, një tjetër hekurudhë me rëndësi të lartë, pasi synohet edhe transporti i mallrave.
Apo, për shembull, projekte si hekurudha Durrës-Rrogozhinë, e cila më tej mund të bëjë të mundur lidhjen përmes segmentit Rrogozhinë-Pogradec, i cili do të rehabilitohet.
Për të mos u lënë pas edhe Aeroporti i Vlorës, i cili bëhet së shpejti funksional.
Zvicra e Ballkanit dhe turizmi elitar
Synimi i vërtetë përfundimtar është ai i të kthyer të Shqipërisë drejt një turizmi më elitar. Ai i sotmi mbetet masiv dhe fitimprurës, por nuk mund të jetë i përhershëm.
Vetë Rama e përmendi faktin se potenciali i madh që zonat malore kanë, i shtyn ato drejt një turizmi më elitar dhe me të ardhura të larta.
Sipas Ramës, Shqipëria, pas turizmit detar, do të ketë zhvillimin e saj në turizmin malor, ku ajo do të krahasohet me një Austri dhe Zvicër të Ballkanit.
“Pasuria më e posaçme e shqiptarëve në aspektin e thesarit të natyrës, nuk është kjo, por është gjithë kjo që është këtej brenda, dhe mbi të gjitha janë zonat malore të Shqipërisë, qoftë në verilindje dhe juglindje. Shqipëria do mund të çlirojë konsumatorë të nivelit të lartë të turizmit”, përmendi kryeministri.
Teksa, shtoi më tej: Ajo që e bën unike Shqipërinë është që këto dy i ka shumë afër (referuar detit dhe malit). Shqipëria është shumë e vogël, por ka dy dete dhe ka nëntë lumenj. Shqipëria është shumë e vogël dhe ka male afër detit. E gjithë kjo që deti po i sjell Shqipërisë është e rëndësishme. Por më pas kjo do të jetë themeli që do ndërtohet më vonë. Do jetë një Austri dhe Zvicër e Ballkanit”./Albanian Post/Katror.info
Përgatiti:
