Në shkollën fillore “Samidin Emini” në fshatin Kuk të Komunës së Dragashit në jug të Kosovës, është ngritur një kënd i lojërave nga Delegacioni Përfaqësues i Turqisë që shërben në kuadër të Forcës Paqeruajtëse të NATO-s në Kosovë (KFOR).
Në ceremoninë e hapjes së këtij këndi morën pjesë Konsulli i Përgjithshëm i Turqisë në Prizren Celal Doğan, Kryetari i Partisë Demokratike Turke të Kosovës (KDTP) njëherësh Ministri në detyrë i Zhvillimit Rajonal, Fikrim Damka, Kryetari i Delegacionit Përfaqësues të Turqisë në Kosovë, Kolonel Ersin Çelikkanat, Kryetari i Komunës së Dragashit Bexhet Xheladini, mësues dhe nxënës.
Në fjalën e tij këtu, koloneli Çelikkanat tha se janë shumë krenarë që po realizojnë projekte në fushën e arsimit për të ndihmuar Kosovën të arrijë një të ardhme të ndritur. Ai theksoi se kanë ndërmarrë shumë projekte të suksesshme për të ofruar mundësitë e nevojshme për fëmijët dhe të rinjtë e Kosovës.
Mundesh me e lexu edhe…
“Jemi shumë krenarë dhe të lumtur që përmes këtyre projekteve që kemi zbatuar, forcojmë miqësinë tonë shekullore dhe marrëdhëniet vëllazërore me Kosovën”, tha ai, transmeton Anadolu.
Ministri Damka shprehu mirënjohjen e tij për mbështetjen e sinqertë dhe të qëndrueshme të Turqisë për Kosovën. “Ky park nuk është vetëm një kënd lojrash, por edhe simbol i dashurisë dhe mbështetjes së Turqisë për popullin e Kosovës”, tha Damka.
Pas fjalimeve, ceremonia përfundoi me prerjen e shiritit të hapjes së këndit të lojërave të shkollës fillore “Samidin Emini”.
Ushtarët turq në kuadër të KFOR-it kanë shërbyer si paqeruajtës në Kosovë që nga viti 1999./Anadolu/Katror.info
