Alpinistja kosovare, Uta Ibrahimi, Ditën Botërore të Maleve e ka rezervuar ta publikojë dokumentarin “Run for Sharr” përmes të cilit bën thirrje që të ruhen Malet e Sharrit dhe pasuritë bimore e shtazore që ai ofron.
Uta, që është vajza e parë shqiptare që ka ngjitur majen e Mont Everestit, shihet si frymëzim për të gjithë të rinjtë që të ndjekin ëndrrat e tyre.
Uta, e cila është autore e librit shumë të dashur për fëmijë “Uta e Maleve” në të cilin rrëfen “prekjen e majës më të lartë të botës, Mont Everest” në një postim në Facebook shpjegon dashurinë që i japin malet e Kosovë, në veçanti, Malet e Sharrit.
Mundesh me e lexu edhe…
“Malet e Sharrit, janë malet më të dashtuna për mu. Më kanë tjetërsua, më kanë bë njeri ma të mirë, njeri ma të lumtur, ma të ndjeshëm edhe më të fortë. Sharri më ka ndihmu me arrit qëllime te mëdha në jetë, sikurse me u ngjit ne Majat ma të nalta të Botës. Më ka frymëzua me e dashtë edhe më shumë natyrën e me dhanë gjithçka prej vetes për ruajtjen e saj,” ka shkruar Uta.
Duke uruar Ditën e Maleve, Uta fton për përjetimin e malit të mahnitshëm të Sharrit përmes ngjitjes apo ecjes nëpër të.
“Miq, ju që ende nuk e keni ecë Sharrin, këto male janë të jashtëzakonshme në çdo stinë. Pranvera, vera, vjeshta dhe dimri, të gjitha kanë potencial të madh turizmi, por jo nëse nuk i ruajmë edhe nuk i dojmë malet tona. Malet ruhen e duhen, atëherë kur nuk prehen, nuk ndërtohen, nuk asfaltohen,” ka shkruar Uta, duke bërë thirrje për përkujdesjen dhe ruajtjen e natyrës.
“Është momenti i fundit për të gjithë ne, ta gjejmë një mënyrë, ta kemi një plan, të përfitojmë nga natyra pa e dëmtuar atë. Ta ruajmë dhe ta kthejmë natyrën në anën tonë dhe të zhvillimit të vendit tonë. Çdo hap, çdo fushë e luginë e Maleve të Sharrit është ndryshe prej tjetrës, e pasur me burime ujore, bimë, lule të bukura, kafshë të egra dhe të rralla. Mijëra lule, bimë e drunjë në këto male janë unike. I rrallë është edhe Rrëqebulli i Sharrit. Ndërtimet pa leje në zonat e ndaluara, ndërtimet e hidrocentraleve pa kurrfarë planifikimi, prerja e drunjve, bërlloku që ta zën frymën, gjuetia – duhet me u ndalën.”
Uta ka shkruar se përmes dokumentarit të publikuar ka dashur të “inspiroj, dhe ta bëj të mundur që herën e ardhshme të flasim sa mijë drunj janë mbjellë, jo sa janë pre.”
“Unë për vete, sa të kem frymë do të vazhdoj me ju ngjit Sharrit sepse aty mbushem me dashni. Ndjenjën qe e përjetoj në Sharr kam dëshirë me e nda me të gjithë që i has nëpër ekspeditat e mia në Himalaja. Ju flas të gjithëve dhe kam dëshirë edhe ata me ardhë këtu dhe me ja përjetu bukurinë Sharrit. Por miq të dashur, dashnia jeme e pafund s’mjafton me i ruajt këto male. Andaj, ju ftoj ta shikojmë këtë dokumentar bashkë, të realizuar një vit më parë dhe ju ftoj që t ‘bëhemi bashkë për me i ruajt malet tona,” ka shkruar alpinistja e njohur.
Alpinistja Uta Ibrahimi, vajza e parë nga Ballkani e cila ka ngjitur 5 majat e Himalajeve u zgjodh kohë më parë Ambasadorja e parë e kompanisë Bight Gear si dhe u një nga 6 alpinistet më të mira në botë që do të ngjesin majën e katërt më të lartë në botë Lhotse South Face (8516m).
Në majin e kaluar alpinistja Uta Ibrahimi është ngjitur në majën e pestë më të larët në botë Maja Makalu në Nepal. Për Utën kjo ishte ngjitja e 7-të prej 14 majave sa do t’i ngjisë në projektin e saj të madh “14 Majat e Himalayave – Utalaya”. /Katror.info
Përgatiti:
