Që nga mosha 16 vjeçare merret me punë vullnetare. E sot ato që i ka mësuar dëshiron t’i ndajë me nxënësit tjerë të komunitetit ku jeton. Është ky Eris Sadiku, nga Mitrovica, djaloshi i cili drejton organizatën North Innovation Center që ka për qëllim promovimin e vullnetarizmit, por pa lënë anash edhe luftimin e dukurive negative si bullizmi e parandalimi i dhunës nëpër shkolla.
” Merrem me vullnetarizëm që nga mosha 16 vjeç. Më ka ndihmuar shumë me i hap horizontet, me i zbulu pasionet e mia, me largu monotoninë e ditës që e kemi pasë prej shkollës, punës. Është diçka që të bën mirë shpirtërisht kur je në gjendje me i ndihmu komunitetit dhe qytetit” – Eris Sadiku –
” Mua më kanë shtyrë prindërit; më ka shty nana kryesisht me aktivitetet që i ka mbajtur nëpër shkolla. Aty i kam marrë bazat e para të vullnetarizmit.” – Eris Sadiku –
Mundesh me e lexu edhe…
Në fund të muajit shtator organizata e tij ka mbajtur trajnim me rreth 30 nxënës nga Mitrovica. E ata që ishin të pranishëm në trajnim mbeten të mahnitur me idetë dhe rrënjosjen e vullnetarizmit te të rinjtë.
Albina Ibishi, praktikante në zyrën e punësimit, thotë se e pa entuziazmin të nxënësve që ishin të etur për të bërë ndryshime pozitive në komunitetet e tyre. Ajo shprehet e impresionuar nga gatishmëria e tyre për të dhënë një dorë ndihme gjatë emergjencave lokale dhe nga ajo se si e kuptojnë ata rëndësinë e solidaritetit.
“ Duke e pasur parasysh se po dominon teknologjia, e pashë një energji të mirë të fëmijëve prezente. Kanë ide për me bo diçka duke u nisur prej lagjes ku banojnë, nëpër shkolla, që ndoshta edhe ne njerëzit më të rritur nuk jemi në gjendje me i ndërmarrë ato iniciativa.” – Albina Ibishi –
E për realizimin e një trajnimi si ky, Erisi ka mbledhur rreth vetes figura të ndryshme që vullntarizmin e kanë pjesë të jetës së përditshme. E tillë është drejtoresha e shkollës fillore “Shaban Idrizi” në Zhabar, Saranda Ademi, e cila nuk është vetëm përgjegjëse për menaxhimin e përditshëm të shkollës dhe të procesit arsimor, por gjithashtu është thellësisht e përfshirë në aktivitete të ndryshme vullnetare dhe përpjekje humanitare.
Shkolla e Sarandës ka ndërmarrë iniciativa kundër bullizmit, ka organizuar aktivitete për ndërgjegjësimin e nxënësve dhe ka mbështetur fëmijët me nevoja të veçanta duke iu ofruar dhurata. Ata gjithashtu kanë ndërmarrë projekte të ndryshme për ruajtjen e mjedisit.
“ Me rëndësi është me pasë qëllimin e mirë. Ka edhe nxënës që vijnë me ide të ndryshme te unë sepse e kanë pa që e kanë derën e hapur. Ajo çka është e rëndësishme, ne si shoqëri duhet me ia ngulit herët rëndësinë e vullnetarizmit, sepse sot është një vullnetar e nesër do të bëhet qytetar i ndërgjegjshëm, domethanë, që të punojë për komunitetin ku ai jeton.” – Saranda Ademi –
Fahri Jashari, ka shumë vite që i është përkushtuar vullnetarizmit me qëllim të transformimit të komunitetit të tij.
“ Ajo që më ka nxit të jem vullnetar qysh në moshë të re është motivi dhe ideja për me ndërru gjendjen në komunitetin ku unë kam jetuar për shumë vite. Unë përveç si vullnetar pastaj edhe kam qenë udhëheqës i projekteve të ndryshme që kryesisht kanë pasur të bëjnë me promovimin e vullnetarizmit në qytetin e Mitrovicës.” – Fahri Jashari –
Përmes iniciativave të ndryshme ai ka inkurajuar nxënës nga shkolla të ndryshme që të përfshihen në punë vullnetare. Në trajnimin e mbajtur në Mitrovicë, ai i ka nxitur nxënësit që t’i orientojnë idetë e tyre përmes klubeve si Klubi i Gjelbërt dhe Klubi i Humanizmit.
” Unë jam munduar edhe gjatë debatit me nxënës që t’i motivoj dhe inkurajoj për të qenë pjesë e aktiviteteve dhe punës vullnetare dhe qytetarisë aktive, duke ofruar shembuj konkret dhe duke treguar rrugën se nëpër çfarë kam kaluar unë për të ardhur deri këtu. Unë po mendoj se motivi kryesor i nxënësve duhet të jetë dëshira dhe vullneti për me qenë pjesë e aktiviteteve, dhe këto dy dukuri unë I vërejta te nxënësit dhe kam besim shumë të madh që këta nxënës në të ardhmen do të fillojnë edhe zhvillohen si në aspektin personal ashtu edhe profesional për vullnetarizëm dhe qytetari aktive… Gjithmonë kam pasur një ndjesi të veçantë për me qenë pjesë e aktiviteteve që janë zhvilluar.” – Fahri Jashari –
Saranda Ademi, që e lidh vullnetarizmin e saj me rolin e rëndësishëm të babait të saj që ishte koordinator i shoqatës humanitare e bamirëse “Nëna Tereze” në Mitrovicë, tregon sesa e rëndësishme është që aktivitete të tilla të mbahen vazhdimisht në shkolla.
” Ne kemi ndërmarrë iniciativa sa i përket bullizmit. Kemi bërë shumë aktivitete që fëmijët me u ndërgjegjësua që mos ta bullizojnë njëri tjetrin. Pastaj kemi pasur aktivitete për fëmijët me nevoja të veçanta – (aktivitet) që është mirëpritur shumë. Kemi dërguar dhurata. Fëmijët në baza vullnetare i kanë mbledhur ato dhurata dhe bashkërisht kemi shkuar dhe kemi bërë vizita. Pastaj për ruajtjen e ambientit kemi ndërmarrë aksione të ndryshme.” – Saranda Ademi –
Vullnetarizmi nuk ka të bëjë me përfitime personale por, ka të bëjë me krijimin e një qëllimi që lidh individët dhe nxit një ndjenjë të komunitetit. Albina beson se ndërmarrja e veprimeve të vogla, si për shembull përmirësimi i mjedisit rrethues, me kohë duhet të shndërrohet në përpjekje kolektive.
” Nëse jemi me një ambient dhe shohim mbeturina nuk është e domosdoshme që me prit vetëm prej pjesës se komunitetit që e ka për detyrë pastrimin e qytetit. Pse mos me marrë na vetë iniciativë me pastru kur jetojmë aty, krejt çka bohet është prej dorës së njeriut dhe bile ta bëjmë për të mirë.” – Albina Ibishi –
Qëllimi kryesor i takimeve të tyre është të frymëzojnë studentët të angazhohen në vullnetarizëm, duke theksuar se ai nuk është një detyrim, por një zgjedhje e nxitur nga ndjeshmëria dhe ndjenja e detyrës ndaj komunitetit të tyre.
E organizatori i trajnimit Eris Sadiku, beson se vullnetarizmi nuk përcaktohet nga mosha; është thjesht çështje e ndjeshmërisë së individit.
“Vullnetarizmi kur bëhet, nuk është sfidues hiç, se është diçka që bëhet prej zemrës, bëhet prej shpirtit. Domethanë, sfida te vullnetarizmi nuk ka.” – Eris Sadiku –
Edicionin #25 të plotë e gjeni KËTU 🙂
Përgatiti:
