Warner Music Group (WMG) ka njoftuar zyrtarisht se është duke punuar në një biografi të animuar për këngëtaren legjendare franceze Edith Piaf, të quajtur Edith, e cila do të realizohet duke përdorur teknologjinë e avancuar të inteligjencës artificiale (AI), raporton Pitchfork.
Teknologjia e avancuar e AI do të rikrijojë zërin dhe imazhin e këngëtares së famshme më shumë se 60 vjet pas vdekjes së saj dhe filmi do të tregojë jetën e saj në Nju Jork dhe Paris, nga vitet 1920 deri në vitet 1960. Mbajtësit e të drejtave të autorit të Edith Piaf, të cilët janë kryesisht anëtarë të familjes së saj, kanë rënë dakord të punojnë me WMG për të përcjellë historinë e saj.
“Është një privilegj i madh të punosh me pronarët e të drejtave të autorit të Edith Piaf për të sjellë historinë e saj në shekullin e 21-të,” tha Julie Veille, një nga skenaristët e filmit. “Gjatë produksionit të filmit, ne vazhdimisht pyesnim veten: “Nëse Edith do të ishte me ne, çfarë mesazhesh do të donte të përcillte tek brezat e rinj?”
Mundesh me e lexu edhe…
Historia e saj është një histori e qëndrueshmërisë së jashtëzakonshme, e tejkalimit të pengesave dhe sfidës së normave shoqërore për të arritur sukses – dhe është një histori që është po aq e rëndësishme sot sa ishte atëherë. Qëllimi ynë është të përdorim përparimet më të fundit në animacion dhe teknologji për të sjellë një histori të përjetshme për audiencën e të gjitha moshave.”
Projekti bazohet në një skenar që Veille shkroi me Gilles Marliac. Warner Music Group dhe kompania e produksionit Seriously Happy do të punojnë për prodhimin e filmit biografik. Në trajnimin e AI, janë përdorur regjistrime arkivore dhe foto të këngëtares së njohur.
Lajmi për filmin e ardhshëm biografik u prit me një ortek reagimesh negative për shkak të përdorimit të teknologjisë artificiale. Përveç kësaj, shumë adhurues të filmit e konsiderojnë këtë film të panevojshëm sepse 16 vjet më parë mund të shihnim një film të shkëlqyer për Edith, të quajtur La Vie en Rose, në të cilin këngëtarja e famshme u luajt nga Marion Cotillard, e cila fitoi një Oscar për performancën e saj.
“Kjo është kaq e neveritshme. E di që familja e saj e mbështeti realizimin e filmit, por nuk duhet të jetë kështu. Inteligjenca artificiale nuk duhet të ringjallë artistë të vdekur për të luajtur në biografi,” shkroi një përdorues në Reddit.
“Ne kishim një film për Edith Piaf dhjetë vjet më parë. Marion Cotillard fitoi Oscar për aktoren më të mirë. Pse kjo?” shtoi një përdorues tjetër.
“Nuk do ta shikojmë këtë film”, “Shpresoj të jetë një dështim si përshtatja e muzikalit Cats”, “Kjo është kaq distopike”, “Lëri të vdekurit të pushojnë në paqe”, janë vetëm disa nga komentet negative, që po përhapen në rrjetet sociale. /Katror.info
Përgatiti:
