Kryetari i Bordit të Asociacionit të Gazetarëve të Kosovës (AGK), Xhemajl Rexha, është zgjedhur anëtar i Bordit Drejtues të Federatës Evropiane të Gazetarëve (EFJ). Kjo është hera e parë që një përfaqësues nga Kosova bëhet pjesë e këtij organi drejtues të nivelit evropian.
Sipas njoftimit të AGK-së, zgjedhja e Rexhës u bë gjatë Kongresit Zgjedhor të EFJ-së, i cili u mbajt më 2 dhe 3 qershor në Budapest të Hungarisë. Në këtë kongres morën pjesë mbi 120 gazetarë dhe përfaqësues të sindikatave të gazetarëve nga 38 vende të Evropës.
Në garë për Bordin Drejtues ishin 11 kandidatë, prej të cilëve u zgjodhën shtatë anëtarë për një mandat trevjeçar. Përveç Xhemajl Rexhës, në Bord u zgjodhën edhe Andrea Roth (Gjermani), Allan Boye Thulstrup (Danimarkë), Renske Heddema (Holandë), Antonis Repanas (Greqi), Aise Banu Tuna (Turqi) dhe Sergiy Tomilenko (Ukrainë).
Mundesh me e lexu edhe…
Në këtë takim u zgjodhën gjithashtu edhe Presidentja e re e EFJ-së, Maja Server, dhe Nënkryetari Pablo Auiqel Garbarini nga Franca.
Bordi Drejtues i EFJ-së, si organi më i lartë ekzekutiv i federatës, përfaqëson mbi 300 mijë gazetarë nga i gjithë kontinenti. Ky Bord ka për detyrë të udhëheqë veprimtaritë e EFJ-së, të vendosë për prioritetet strategjike, të miratojë buxhetet dhe të mbrojë interesat e gazetarëve evropianë.
AGK ka vlerësuar se zgjedhja e Xhemajl Rexhës në këtë pozitë është një njohje e rëndësishme për punën e vazhdueshme të gazetarëve në Kosovë dhe për përkushtimin e organizatës në mbrojtjen e të drejtave të tyre dhe të lirisë së shprehjes.
“Ky është një hap i madh për gazetarinë kosovare dhe përfaqësimin tonë në organizatat ndërkombëtare,” thuhet në njoftimin e AGK-së. /Katror.info
Përgatiti:
