Fundi i korrikut është një nga periudhat më të mira të vitit për të vëzhguar meteorë që kalojnë në qiellin e natës, sipas Shoqatës Amerikane të Meteorëve (AMS). Këtë javë, tre shi meteorësh – Alpha Capricornidët, Southern Delta Aquariidët dhe Perseidët – do të ndodhin njëkohësisht, duke ofruar një spektakël mahnitës për vëzhguesit e yjeve.
Një ndihmë e madhe për shikueshmërinë do të jetë hëna, e cila do të jetë në horizont gjatë mbrëmjes por do të perëndojë përpara se aktiviteti i meteorëve të arrijë kulmin. Kjo do të thotë që drita e saj nuk do të ndikojë negativisht në pamjen e meteorëve.
NASA rekomandon që spektatorët të qëndrojnë të shtrirë në një zonë pa ndotje drite dhe të presin rreth 30 minuta që sytë të përshtaten me errësirën, shkruan ABCNews, përcjell Katror.info.
Mundesh me e lexu edhe…
Alpha Capricornidët
Ky shi meteorësh filloi më 7 korrik dhe do të zgjasë deri më 13 gusht, me kulmin më 30 korrik. Alpha Capricornidët janë të njohur për “fireball”-et e tyre – topa zjarri të mëdhenj që mund të shihen edhe kur meteorët e tjerë janë më të zbehtë. Shpejtësia e tyre është më e ulët krahasuar me meteorë të tjerë dhe më së miri shihen pas mesnate, kur edhe “radianti” i tyre ndodhet më lart në qiell.
Southern Delta Aquariidët
Ky shi ka filluar më 19 korrik dhe do të zgjasë deri më 13 gusht. Kulmin e ka po ashtu më 30 korrik dhe është më aktiv në orët e vona të natës, rreth orës 3 të mëngjesit. Në hemisferën jugore, numri i meteorëve në orë mund të arrijë deri në 20. Ata janë më të shpejtë dhe më të shkurtër se Alpha Capricornidët dhe mund të dallohen lehtë nga vendndodhja e tyre, pranë yllit Delta Aquarii.
Perseidët
Të konsideruar si spektakli më i mirë vjetor meteorësh, Perseidët kanë filluar më 17 korrik dhe do të zgjasin deri më 23 gusht. Kulmi i tyre pritet më 12 gusht. Ata vijnë nga mbetjet e kometës Swift-Tuttle dhe njihen për meteorët e ndritshëm dhe shpërthimet me ngjyra që lënë pas gjurmë të dukshme në qiell.
Për t’i parë më mirë, sugjerohet të shikoni drejt yjësisë Perseus në orët para agimit, veçanërisht në hemisferën veriore./Katror.info
