Organizatorët e udhëtimeve prej vitesh kanë vënë re se është e vështirë të bindësh dikë të shkojë në një destinacion që nuk i përshtatet interesave të tij.
Dikush që adhuron koncertet mund të mos durojë kurrë kampingun në Glastonbury, ndërsa një tjetër që nuk rri dot ulur do të mërzitej me pushime në plazh.
Ka edhe nga ata që kërkojnë vetëm relaks dhe do ta quanin një itinerar të mbushur me aktivitete një torturë.
Mundesh me e lexu edhe…
Sigurisht, njerëzit ndonjëherë mund të dalin nga zona e tyre e rehatisë dhe të surprizohen, por kur ditët e pushimit janë të pakta, zgjidhja më e mençur është që udhëtimi të përputhet me tipin e udhëtarit.
Për këtë arsye, Lonely Planet ka përzgjedhur shtatë destinacione të përshtatura për shtatë profile të ndryshme udhëtarësh.
1. Planifikuesi: Golden Route, Japoni
Japoni është parajsa e organizimit: trenat nuk vonohen as një sekond, gjithçka hapet e mbyllet sipas orarit. Itinerari 10-ditor “Golden Route” përfshin Tokion me metronë dhe kuzhinën e tij, Kioton, parqet e Naras, ushqimin e Osakës dhe memorialet e Hiroshimës.
2. “People pleaser”: Palma de Mallorca, vetëm
Ata që gjithmonë thonë “po” kanë nevojë për pushime vetëm. Në Palma, mund të shëtisin në ritmin e tyre, të ndalojnë për një ensaïmada pa pyetur askënd dhe të vizitojnë katedralen madhështore ose tregun Mercat de l’Olivar. Me trenin panoramik drejt Sóller-it përmes plantacioneve të agrumeve, fleksibiliteti spanjoll i jep fund ndjenjës së fajit.
3. Eksploratori: destinacionet e nënvlerësuara të Europës
Këta duan vende ku s’ka shkelur askush. Në vend të Pragës, Brno; në vend të Brukselit, Dinant; Leipzig në vend të Berlinit, apo Cádiz si alternativë ndaj Seviljes. Të gjitha ofrojnë kulturë, arkitekturë e jetë nate, por pa turma. Bonus: krenaria për të thënë “Ende s’ke qenë në Brno?”.
4. Energjiku: Zelanda e Re
Për ata që nuk rrinë dot ulur, Zelanda e Re ofron 11 shëtitje shumëditore. Hump Ridge Track kalon plazhe, pyje dhe ura spektakolare, duke kombinuar sfidë fizike dhe natyrë marramendëse. Ky udhëtim kërkon energji, planifikim dhe dashuri për aventurën.
5. Introverti që e do gjumin: Jugu i Maine, SHBA
Këta udhëtarë duan qetësi, det dhe gjumë të thellë. Në Ogunquit, hotelet mbi shkëmbinj ofrojnë pamje nga oqeani, shëtitje përgjatë Marginal Way dhe darka të thjeshta me ushqim deti. Jashtë sezonit, atmosferë intime, zjarr në oxhak dhe respekt për privatësinë.
6. Ekstroverti: ishujt e Kroacisë
Ata që bëjnë miq në çdo bar, do ta duan Kroacinë. Një tur nga Spliti në Dubrovnik, me ndalesa në Braç, Hvar, Korçulë e Mljet, është ideal. Çdo traget, plazh apo festival veror shndërrohet në një arenë shoqërimi.
7. Adhuruesi i mirëqënies: Kosta Rika
Për ata që kërkojnë balancë mes trupit dhe shpirtit, Kosta Rika është vendi ideal. Nicoya, një nga “zonat blu” të botës, ofron yoga, ushqim bio dhe lidhje me natyrën. Spa me ujëra termale, trajtime ajurvedike dhe pushime detoks në resorte si Tabacón apo The Retreat, krijojnë eksperiencën e ‘riformatimit’ total. /shqip.al/Katror.info
