Pas pranimit të komenteve nga institucione, organizata dhe qytetarë lidhur me paralajmërimin për rritjen e çmimit të energjisë elektrike, Zyra e Rregullatorit për Energji (ZRRE) ka nisur konsultimet me palët e përfshira, të cilat do të zgjasin deri më 10 prill.
Iniciativa qytetare “Asnji cent ma shumë” ka paralajmëruar protestë dhe kërkon pezullimin e vendimit, ndërsa ka marrë mbështetje edhe nga Dhoma e Tregtisë dhe ekonomistë që ofrojnë alternativa për të shmangur rritjen. ZRRE pritet të marrë vendim më 11 prill.
Një javë pas pranimit të komenteve nga palët lidhur me paralajmërimin për rritjen e çmimit të energjisë elektrike, Zyra e Rregullatorit ka nisur konsultimet me palët që kanë dërguar komente, e që do të vazhdojnë deri më 10 prill.
Mundesh me e lexu edhe…
Kryesuesi i ZRRE-së, Ymer Zejnullahu, tha përmes telefonit se do t’i takojnë përfaqësuesit e të gjitha palëve që kanë dërguar komente.
Disa nga palët që kanë dërguar komente në ZRRE janë Presidenca, Ministria e Ekonomisë, deputeti Armend Muja, Oda Ekonomike e Kosovës, sindikata të ndryshme, organizata të shoqërisë civile e shumë të tjera.
Pikërisht për këtë paralajmërim, qytetarët janë bashkuar në iniciativën “Asnjë cent më shumë”, për çka edhe kanë paralajmëruar një protestë për të shtunën. Luan Hasanaj nga kjo iniciativë thotë se akoma s’kanë marrë ftesë nga ZRRE për takim, por që edhe nëse ftohen, nuk do ta pranojnë atë.
“Ne ZRRE-së i themi që nuk ka, në këtë fazë është konsumuar madje edhe debati publik, ajo çfarë duhet të bëj ZRRE-ja është ta pezulloj këtë vendim përkohësisht, të presim konstituimin e institucioneve, të merren masa prej qeverisë së ardhshme për t’i përmirësuar kushtet socio-ekonomike në vend dhe tek pastaj mund të ulemi dhe të diskutojmë për çështjen që kanë të bëjnë qoftë me rritjen e çmimit, qoftë për ndonjë aspekt tjetër ekonomik të vendit tonë”, tha Luan Hasanaj, nga iniciativa “Asnjë cent më shumë”.
Në grupin e qytetarëve të hapur në rrjete sociale, ekonomisti Shenoll Muharremi ka publikuar komentet që ka dërguar në ZRRE.
Sipas tij, ky dokument shqyrton temën prej të gjitha këndeve, përfshi ekonomike, dhe ofron një zgjidhje konkrete që e bën të panevojshme rritjen e çmimeve dhe ndihmon për të shmangur një valë të re inflacioni, duke mbrojtur qytetarin, bizneset dhe ekonominë.
Njëra ndër pikat e komenteve që ka dërguar Muharremi thuhet se ZRRE duhet të zhvillojë dialog me Qeverinë e Kosovës për të arritur një marrëveshje për subvencionim direkt nga buxheti i shtetit në vlerë prej 72.2 milionë euro. Një veprim i tillë, siç shkruan ai, do të shmangte ndikimin e drejtpërdrejtë të inflacionit në ekonomi dhe, mbi të gjitha, do ta bënte të panevojshme rritjen e tarifave të energjisë në një moment të ndjeshëm për shoqërinë dhe ekonominë e vendit.
Ndërkohë, nga Dhoma e Tregtisë dhe Industrisë kanë bërë të ditur se mbështesin protestën e paralajmëruar për të kundërshtuar rritjen e çmimit të energjisë.
“DhTIK rithekson se rritja e paralajmëruar e çmimit të energjisë do të ketë ndikim negativ zinxhirë, pra do të ulë të hyrat e biznesit dhe për pasojë do ulen edhe të hyrat e buxhetit, do rrezikohen vendet e punës, si dhe bizneset pa dashjen e tyre, do të detyrohen të rrisin çmimin e produkteve, duke u vënë në situatë të vështirë karshi konkurrencës nga jashtë”, thuhet në reagimin e dhomave.
ZRRE ka bërë të ditur se, pasi të përfundojnë të gjitha takimet, më 11 prill do të bëjë të ditur vendimin për rritjen ose jo të çmimit të energjisë elektrike./Katror.info
Përgatiti:
