Sot (e shtunë) mbahet protestë për të kundërshtuar propozimin e Zyrës së Rregullatorit për Energji (ZRrE) për ngritjen e çmimit të rrymës për 15 për qind nga muaji prill, raporton KosovaPress.
Protesta po organizohet nga nisma “Jo Rritjes së Çmimit të Energjisë Elektrike në Kosovë! AsnjeCentMeShumë”, e cila pritet të fillojë nga ora 15:00 nga sheshi “Skenderbeu” në Prishtinë.
Themeluesi i këtij grupi, Luan Hasanaj thekson se janë në përgatitjet finale për këtë protestë, duke shtuar se mobilizimi është jashtëzakonisht i madh dhe se grupi ka mbi 5 mijë anëtarë.
Ai derisa konsideron rritjen e çmimit të energjisë si një vendim të dëmshëm për qytetarët e Kosovës, bënë gjithashtu thirrje për pjesëmarrjen e një numri të madh qytetarësh që do të kundërshtojnë këtë vendim.
Bizneset ta mbështesin protestën
Ai po ashtu ka bërë të ditur se një numër i bizneseve e kanë konfirmuar që në shenjë solidariteti me protestën, prej orës 15:00 deri në 16:00 do t’i mbyllin bizneset e tyre.
Më 14 mars, Zyra e Rregullatorit për Energji Elektrike në Kosovë njoftoi se ka propozuar shtrenjtimin e çmimit të energjisë elektrike për rreth 15 për qind – nga muaji prill.
Dhoma e Tregtisë dhe Industrisë Kosovë (DhTIK) mbështet protestën e thirrur për sot, për të kundërshtuar rritjen e paralajmëruar të çmimit të energjisë.
Që nga ditët e para kur është përmendur rritja e çmimit të energjisë, DhTIK ka ngritur alarmin duke u kërkuar institucioneve që të veprojnë për ta parandaluar një veprim të tillë, raporton KosovaPress.
Po ashtu, edhe Këshilli për Mbrojtjen e të Drejtave e të Lirive të Njeriut (KMLDNj) fton qytetarët e Kosovës që të dalin në numër sa më të madh në protestën e paralajmëruar për sot, për të kundërshtuar rritjen e çmimit të energjisë elektrike dhe për të kërkuar përgjegjësi nga ZRRE dhe për mos kompensim të dëmit të bërë.
KMDLNJ përkujton se kjo është rritja e tretë e çmimit të rrymës gjatë mandatit 4-vjeçar të Qeverisë Kurti 2 që nënkupton se rritja e tretë e çmimit të rrymës e kompleton shifrën prej 146 për qind, transmeton KosovaPress./Katror.info
Përgatiti:
