Një grup nxënësish të shkollës së mesme në Arkansas kanë zhvilluar një aplikacion falas që detekton shenjat e kancerit oral përmes një fotografie të thjeshtë të bërë me telefon. Aplikacioni, i quajtur Oral Scan, përdor inteligjencën artificiale për të identifikuar tumorët me një saktësi prej 82%, ndërsa mund të përcaktojë edhe fazën e sëmundjes me saktësi 87%, shkruan GoodNewsNetwork, përcjell Katror.
“Mësuam që metodat aktuale të diagnozës janë të shtrenjta, invazive dhe shpesh të pasakta, duke e bërë zbulimin e hershëm të rrallë,” ka thënë Veera Unnam, anëtare e ekipit nga shkolla Bentonville West High School.
Sipas të dhënave të ekipit, çdo vit 52 mijë amerikanë diagnostikohen me kancer oral dhe mbi 12 mijë prej tyre humbin jetën. Zbulimi i hershëm mund të rrisë përqindjen e mbijetesës deri në 40%, por aktualisht vetëm 30% e rasteve kapen në kohë. Në shtete si Arkansas, ku mungojnë dentistët, situata është edhe më e rëndë — 90% e popullatës nuk ka vizituar fare dentist vitin e kaluar, ndërsa në disa qarqe nuk ka asnjë dentist aktiv.
Mundesh me e lexu edhe…
Për këtë arsye, aplikacioni i tyre vjen si një mjet i fuqishëm për komunitetet e lëna pas dore. “Çdo diagnozë do të kushtojë vetëm 50 cent dhe përgjigjja vjen për 15 sekonda”, thonë anëtarët e ekipit. Aplikacioni është dizajnuar që të funksionojë në të gjithë botën, në platformat iOS dhe Android, dhe të jetë i thjeshtë për t’u përdorur.
Së fundmi, ata kanë hyrë në garën kombëtare Samsung Solve for Tomorrow, që inkurajon nxënësit të zgjidhin probleme reale përmes teknologjisë dhe dijes STEM. Fituesit do të shpallen më 28 prill në Washington DC, ku tre shkolla do të fitojnë nga 100 mijë dollarë, ndërsa një do të përzgjidhet si Fitues i Zgjedhur nga Komuniteti.
Pavarësisht rezultatit, suksesi i ekipit ka kaluar kufijtë e konkursit — ata janë ftuar të prezantojnë shpikjen e tyre në konferenca mjekësore dhe kanë fituar vëmendje kombëtare në SHBA./Katror.info
