Dështoi sërish konstitumi i Kuvendit. Në vazhdimin e sotëm të seancës konstituive zgjedhja e kryetarit të Kuvendit nuk u hodh fare në votim.
Lëvizja Vetëvendosje, partia fituese e zgjedhjeve, kërkoi marrëveshje politike për të dalë nga kriza.
Opozita e kundërshton votimin e kandidates së Vetëvendosjes për kryeparlamentare, Albulena Haxhiu.
Mundesh me e lexu edhe…
Kryesuesi i seancës, Avni Dehari, e ndërpreu seancën dhe njoftoi se ajo do të vazhdojë të mërkurën.
Kusari-Lila-VV: Ose dakordim, ose zgjedhje të reja
Deputetja e Lëvizjes Vetëvendosje, Mimoza Kusari-Lila, deklaroi se kërkesa për mosprocedimin e kandidaturës së Albulena Haxhiut për kryetare të Kuvendit erdhi si pasojë e deklaratave të opozitës.
Ajo tha se partitë ose duhet të dakordohen për konstituimin e Kuvendit ose vendi shkon në zgjedhje të reja, shkruan Ekonomia Online.
“Ishte kërkesë e grupit tonë parlamentar që të mos procedohet kandidimi i Albulena Haxhiut për kryetare të Kuvendit, për shkak të deklaratave të opozitës. Zgjedhja e kryetarit të Kuvendit kërkon pjesëmarrjen e të gjithë deputetëve dhe është obligim për të gjitha grupet parlamentare. Nga deklaratat e opozitës kuptohet se në momentin që arrihet shumica, ata synojnë të bllokojnë zgjedhjen e nënkryetarit. Letra jonë kishte për qëllim formimin e institucioneve, por ky proces ka mbetur pezull. Me këtë qasje, duhet të dakordohemi, t’i thërrasim të gjitha partitë dhe ta konstituojmë Kuvendin ose të shkojmë me 80 vota në zgjedhje të reja. Nuk jemi të interesuar që kjo bllokadë të vazhdojë, por është e rëndësishme që të ketë vullnet për tejkalimin e këtij ngërçi. Nëse pas dy ditësh partitë reflektojnë, atëherë mund ta konstituojmë Kuvendin në tërësi”, tha Kusari-Lila, pas ndërprerjes së seancës.
Krasniqi-PDK : VV-ja duhet ta ndërrojë kandidatin, sepse nuk kalon
Kryetari i PDK-së, Memli Krasniqi, ka thënë se me Albulena Haxhiun si kandidate për kryeparlamentare do të dështojë. Sipas tij VV-ja duhet ta ndërrojë kandidatin, sepse nuk kalon,.
“Është situatë e paprecedent dhe nuk ka hije një institucioni kaq të rëndësishëm. Koalicioni Vetëvendosje- Guxo-Alternativa ka të drejtën për të propozuar kryeparlamentarin, por jo të imponojë me çdo kusht. Po e vazhdojmë barrën e krijimit të institucioneve. Kandidatja ka dështuar disa herë dhe do të dështojë dhe nuk mund të jetë më e rëndësishme se krijimi i institucioneve. VV-ja duhet ta qes një kandidat tjetër, sepse kandidatja që ka dështuar do të dështojë përsëri. Haxhiu nuk do të ketë mbështetjen tonë në asnjë rrethanë “, tha Krasniqi.
Bajrami-LDK : S’kemi votë as për Haxhiun, as për ndonjë kandidat tjetër, VV të bisedojë me partitë
Deputetja e LDK-së, Hykmete Bajrami, tha se u shkel rregullorja e Kuvendit gjatë procesit të votimit dhe kritikoi VV-në për moskonsultim me partitë e tjera.
Ajo theksoi se nuk do ta votojnë as Albulena Haxhiun dhe as ndonjë kandidat tjetër pa një marrëveshje politike, duke i kërkuar partisë fituese të dialogojë me opozitën.
“Në Kuvend sapo u konstatua se u shkel edhe një herë rregullorja e Kuvendit për faktin që ishim në një proces të votimit. VV-ja do të ishte dashur të procedojë me emër. Paralelja që e tha Konjufca që janë dy gjëra të njëjta nuk është aspak e saktë, sepse kryetari i Kuvendit përfaqëson Kuvendin e Republikës së Kosovës. Kërkesa për kohë shtesë për 48 orë të tjera dhe në të njëjtën kohë insistoi që është e drejtë e tyre për propozimin dhe kërkohet nga deputetët, sipas vullnetit të VV-së dhe jo si vullnetit tonë. Duhet të dëgjohen palët. Sikur këta të ishin të interesuar për marrëveshje politike do të uleshin dhe të zgjedhnim një kandidat të pranuar. Ne nuk kemi votë në dy rastet, as për zonjën Haxhiu, as për ndonjë kandidat tjetër. Përgjegjësia është e partisë fituese, duhet të bisedojnë me partitë politike.”, tha Bajrami.
Haradinaj-AAK: Nëse VV-së i duhen votat e opozitës, duhet ta gjejë një kandidat unifikues
Kryetari i AAK-së, Ramush Haradinaj, pas ndërprerjes së seancës së sotme të konstituimit të Kuvendit tha se nëse VV-së i duhen votat e opozitës duhet ta gjejë një kandidat unifikues për kryetar të Kuvendit.
“Keq që nuk po fillon edhe në kohë, ju e patë 40 minuta me vonesë, e kanë pasur gjithë kohën, dy ditë. Joserioze kjo. Është e vërtetë që edhe në të kaluarën ka pasur negociim për kryeparlamentar. Nëse duhet vota e opozitës për bashkëvotim për kryeparlamentar dhe nënkryetarë, ne kemi thënë si Aleancë, që po të ishte dikush tjetër në vend të zonjës Haxhiu e kishim votuar.
Jemi të hapur për të gjetur një rrugë për konstituimin e Kuvendit. Është çështje e propozuesit, po nëse i duhen vota e partive të tjera duhet të diskutojmë edhe kandidatin.
Nëse VV nuk i ka votat për kandidatin e vetë, atëherë ta gjejmë një kandidat më unifikues.
Ne po presim që në nivel të partive politike të ndodhin këto diskutime”, tha ai.
Limaj: Shpresoj që do të bëhen përpjekje për t’u afruar që të krijohen institucionet
Kryetari i Nismës Fatmir Limaj tha se shpreson që nga sot do të bëhen përpjekjet për t’u afruar që të krijohen institucionet.“Unë besoj që ishte një qëndrim korrekt. Ky është realiteti. Nganjëherë në situatën që është, ju duhet të gjeni rrugë për të ecur tutje.Besoj që ishte qëndrim korrekt për të gjetur rrugë. Në fund të fundit, kjo është mënyra e bashkëpunimit.Shpresoj që nga sot, do të bëhen përpjekjet për me u afru dhe vendit t’i japim institucionet”, tha ai.
Kurti sërish nuk përgjigjet
Kryeministri në detyrë, Albin Kurti, nuk u përgjigj se a do te arrijë kompromis me partitë e tjera për zgjedhjen e kryetarit të Kuvendit.
Ai tek dilte nga objekti i Kuvendit kaloi në heshtje pyetjet e gazetarëve, raporton Ekonomia Online. /Katror.info
Përgatiti:
