Më 1, 2 dhe 3 gusht 2025, kryeqyteti i Kosovës do të marrë edhe një herë vëmendjen e Evropës me rikthimin e Sunny Hill Festival, një nga ngjarjet më të mëdha kulturore e muzikore në rajon.
Me më pak se 100 ditë deri në hapjen e dyerve të festivalit në Bërnicë të Epërme, organizatorët kanë filluar tashmë përgatitjet intensive për të sjellë një edicion që premton të jetë më i madhi ndonjëherë.
Në një intervistë për Telegrafin, dy prej organizatorëve të festivalit, Alban Kastrati dhe Shpat Begolli, zbuluan detaje të rëndësishme rreth konceptit të këtij viti, skenave të reja, përmirësimeve logjistike dhe eksperiencës që i pret vizitorët nga mbarë bota.
Mundesh me e lexu edhe…
“Unë besoj që edicioni i këtij viti do të jetë një ndër edicionet më të mëdha që kemi organizuar ndonjëherë – në çdo aspekt. Qoftë nga ana e programit që po përgatitet për këtë edicion, por edhe nga aspekti organizativ dhe logjistik i hapësirës. Vitin e kaluar kemi pasur një eksperiencë të jashtëzakonshme me hapësirën e re të festivalit, e cila është pëlqyer shumë nga e gjithë audienca, por edhe nga ne. Është përshtatur shumë mirë me formatin e festivalit. Të gjitha përgatitjet janë duke u bërë që ky edicion të jetë më i madhi ndonjëherë i Sunny Hill në Prishtinë” thekson Kastrati. Ai shton se hapësira e festivalit, e testuar me sukses në vitin e kaluar, do të përdoret sërish, me përmirësime të ndjeshme që e bëjnë atë të përshtatur idealisht për formatin e Sunny Hill-it.
Risi në skena dhe program
Sipas Begollit, këtë vit festivali vjen me ndryshime të mëdha në skenografi, përfshirë një skenë kryesore të re, një skenë C4 të re për muzikën elektronike, si dhe një skenë ditore për aktivitete të ndryshme. “Biletat tashmë i kemi hedhur në shitje. Faza e parë, ajo e Believers, po ecën shumë mirë – kjo fazë është për fansat më të mëdhenj të festivalit dhe ofron çmimin më të mirë që dikush mund të paguajë për të marrë pjesë në Sunny Hill Festival. Nga nesër, na ndajnë rreth njëqind ditë deri në fillimin e festivalit dhe përgatitjet, si nga unë ashtu edhe nga Albani, po shkojnë shumë mirë. Këtë vit kemi risi – një skenë kryesore të re, një skenë të re C4 dhe një tjetër për aktivitete ditore. Gjithçka po ecën bukur dhe me ritëm. Sa i përket biletave, kemi edhe pak ditë deri në mbylljen e fazës aktuale të shitjes, pastaj kalojmë në fazat e tjera dhe vazhdojmë me zbulimin e emrave të artistëve”.
Program i strukturuar sipas netëve
Kastrati tregon se çdo natë do të përfshijë dy headliner-a në skenën kryesore dhe dy të tjerë në skenën C4, ndërkohë që skena Elita do të mirëpresë artistë të rinj nga Kosova, rajoni dhe bota.
“Ne e kemi një format që tashmë është përcaktuar. Nata e parë i dedikohet muzikës pop. Nata e dytë është më fleksibile – mund të jetë pop, R’n’B, hip-hop ose ndonjë zhanër tjetër alternativ, si rasti i vitit të kaluar. Nata e tretë i dedikohet muzikës elektronike – po flas për skenën kryesore. Ndërkohë, çdo natë kemi edhe dy headlinerë të tjerë në skenën C4, e cila i dedikohet muzikës elektronike, dhe kemi edhe skenën Elite, që është e hapur për talente të rinj – vendorë dhe ndërkombëtarë – që performojnë gjatë ditës, më pas në skenën kryesore dhe përfundojnë në C4. Për çdo natë kemi së paku dy emra të mëdhenj të muzikës ndërkombëtare, si dhe artistë lokalë që janë shumë të dashur për publikun tonë”, thotë Albani.
Përmirësime të mëdha në logjistikë dhe transport
Një prej sfidave të vitit të kaluar ishte qasja dhe lëvizja brenda hapësirës së festivalit. Këtë vit, organizatorët kanë marrë masa konkrete: “Po punojmë me Komunën e Prishtinës dhe Trafikun Urban për të ofruar transport publik të dedikuar për festivalin, që ka përparësi në qarkullim dhe qasje më të lehtë drejt festivalit,” thotë Begolli. Kjo, përveç sugjerimeve që janë marrë nga vizitorët e edicionit të kaluar, do të kontribuojë në një përvojë më të organizuar për të gjithë.
Një fundjavë përtej muzikës
“Sunny Hill nuk është vetëm një festival muzikor – është përvojë kulturore, gastronomike dhe sociale”, thekson Kastrati. Sipas tij, Prishtina bëhet destinacion ndërkombëtar gjatë kësaj fundjave, duke mirëpritur vizitorë nga mbi 20 vende të ndryshme. Nga mëngjeset nëpër restorantet lokale, deri te netët me performanca të nivelit botëror – çdo detaj është menduar për të ofruar një përvojë të paharrueshme.
“Në asnjë vend tjetër në Evropë nuk mund të shohësh mbi 60 artistë të njohur për një çmim kaq të arsyeshëm”, shton ai.
Siguri dhe përfshirje për të gjitha moshat
Festivalit i jepet rëndësi edhe sigurisë dhe rregullave të pjesëmarrjes, duke përfshirë edhe të rinjtë nën moshën 18-vjeçare, të cilët mund të marrin pjesë vetëm të shoqëruar nga prindërit ose kujdestarët. Ndalohet sjellja e mjeteve të forta dhe e shisheve të xhamit, ndërsa për sendet personale pritet të ketë fleksibilitet.
“Si gjithmonë, për të inkurajuar pjesëmarrjen e të rinjve, kemi lejuar hyrjen për fëmijët mbi 12 vjeç, por vetëm të shoqëruar nga prindërit. Kjo është një praktikë që e ndjekin edhe shumë festivale ndërkombëtare, dhe ne përpiqemi t’i respektojmë këto standarde. Sa i përket rregullave të sigurisë – nuk lejohen mjete të forta, shishe qelqi, apo gjëra të ndaluara në evente të tjera të ngjashme. Për sendet personale jemi fleksibilë, por gjithmonë me prioritet sigurinë e të gjithëve”, thotë Begolli.
Pjesëmarrja e Dua Lipës
Ashtu si çdo vit, edhe këtë herë familja Lipa është pjesë e pandashme e festivalit. “Dua gjithmonë vjen me shumë dëshirë dhe na mbështet maksimalisht në promovimin ndërkombëtar të festivalit”, thotë Kastrati. Pjesëmarrja e saj është një nga faktorët që i jep Sunny Hill-it një jehonë globale dhe imazh të denjë për Kosovën.
Biletat në fazën “Believers” janë tashmë në shitje dhe mund t’i blini në faqen zyrtare të festivalit duke klikuar këtu. /Katror.info
Përgatiti:
