Presidentja e Republikës së Kosovës, Vjosa Osmani, do të nis sot një vizitë shtetërore në Zvicër me ftesë të presidentes zvicerane Karin Keller-Sutter. Kjo vizitë shënon herën e parë që një president i Kosovës realizon një vizitë shtetërore në këtë shtet mik, shkruan Katror.info.
Presidentja Osmani do të pritet me nderime të larta shtetërore dhe ceremoni ushtarake në sheshin qendror Bundesplatz në Bern, ku do të mirëpritet nga presidentja Keller-Sutter.
Gjatë qëndrimit të saj, presidentja Osmani do të zhvillojë takime zyrtare me presidenten e Zvicrës dhe me anëtarët e Këshillit Federal. Ajo pritet gjithashtu të mbajë një fjalim në Parlamentin e Zvicrës, duke adresuar temat kyçe të marrëdhënieve bilaterale dhe partneritetit strategjik ndërmjet dy vendeve. Pas takimeve, të dyja presidentet do të mbajnë një konferencë të përbashkët për media.
Mundesh me e lexu edhe…
Në nder të presidentes Osmani dhe delegacionit të Kosovës, presidentja Keller-Sutter do të organizojë një banket shtetëror, i cili do të shërbejë si simbol i miqësisë dhe bashkëpunimit të qëndrueshëm mes dy shteteve.
Vizita do të vazhdojë në pjesën lindore të Zvicrës, ku të dyja presidentet do të vizitojnë një ndërmarrje prodhuese dhe një qendër të Universitetit të Saint Gallen. Në fund të vizitës, në Gjenevë, presidentja Osmani do të takohet me përfaqësues të mërgatës shqiptare në Zvicër, për të diskutuar mbi rolin dhe kontributin e diasporës në zhvillimin e vendit.
Sipas njoftimit të Presidencës së Kosovës, kjo vizitë ka një karakter jo vetëm historik, por edhe simbolik, duke nënvizuar marrëdhëniet e ngushta, të qëndrueshme dhe shumëdimensionale ndërmjet Kosovës dhe Zvicrës, të ndërtuara mbi histori të përbashkët, vlera demokratike dhe bashkëpunim të ngushtë shtetëror./Katror.info
