Administrata e presidentit amerikan Donald Trump ka urdhëruar një pezullim të përkohshëm të intervistave për viza studentore, një vendim që prek drejtpërdrejt edhe aplikantët nga Kosova që synojnë të ndjekin studimet në Shtetet e Bashkuara të Amerikës.
Sipas një kabllogrami zyrtar të datës 27 maj 2025, të nënshkruar nga Sekretari amerikan i Shtetit, Marco Rubio, ambasadat dhe seksionet konsullore janë udhëzuar të mos caktojnë intervista të reja për viza të kategorive F, M dhe J, deri në një njoftim të dytë.
Ky vendim është pjesë e një fushate më të gjerë për të shtuar kontrollin mbi aplikantët ndërkombëtarë, duke përfshirë verifikimin e rrjeteve sociale të tyre. Administrata ka theksuar se qëllimi është parandalimi i hyrjes së individëve që mund të përbëjnë rrezik për sigurinë kombëtare ose që dyshohet të jenë të përfshirë në aktivitetete antisemitike.
Mundesh me e lexu edhe…
Megjithatë, mungesa e kritereve të qarta për vlerësimin e përmbajtjeve në rrjetet sociale ka nxitur shqetësime në radhët e komunitetit akademik dhe diplomatik. Disa zyrtarë të Departamentit të Shtetit kanë paralajmëruar se udhëzimet aktuale janë të paqarta dhe mund të çojnë në refuzime arbitrare të vizave.
Universitetet amerikane, që varen në masë të madhe nga studentët ndërkombëtarë, përfshirë edhe ata nga Kosova, mund të përballen me pasoja financiare dhe rënie të regjistrimeve për semestrin e ardhshëm.
Për shumë studentë kosovarë që kanë aplikuar për të filluar studimet në SHBA në vjeshtën e vitit 2025, pezullimi përfaqëson një pengesë serioze dhe pa afat të qartë, duke shtuar pasigurinë në një moment kyç të përgatitjeve akademike./Katror.info
