E përditësuar 11:25
Për herë të 25-të ka dështuar përpjekja për konstituimin e Kuvendit të Republikës së Kosovës.
Edhe në seancën e sotme partitë politike PDK, LDK, Lista Serbe, AAK- Nisma nuk propozuan emër deputeti për të qenë anëtarë komisioni për votim të fshehtë.
Mundesh me e lexu edhe…
Vetëm 51 deputetë votuan për, kundër votoi një deputet, dhe kështu në mungesë kuorumi, kryesuesi Avni Dehari e caktoi vazhdimin e kësaj seance për 4 qershor nga ora 11:00.
***
Sot tentativa e 25-të, a do të ketë konstituim të Kuvendit?
Deputetët e Kuvendit të Kosovës kanë dështuar të shtunën, për herë të 24-të me radhë, të konstituojnë përbërjen e re parlamentare që doli nga zgjedhjet e parakohshme të mbajtura në shkurt.
Pavarësisht thirrjeve të vazhdueshme nga shoqëria civile dhe faktori ndërkombëtar për formimin sa më të shpejtë të institucioneve, bllokada politike po vazhdon.
Subjektet politike nuk po arrijnë marrëveshje për zgjedhjen e kryetarit të Kuvendit, proces i domosdoshëm për hapjen e rrugës drejt krijimit të Qeverisë së re.
Seanca e 25-të konstituive është thirrur për sot(e hënë), me fillim nga ora 10:30.
Sipas rregullores së Kuvendit, propozimi për kryetar i takon ekskluzivisht partisë fituese të zgjedhjeve – Lëvizjes Vetëvendosje (LVV).
Kjo e fundit ka nominuar Albulena Haxhiun për këtë post dhe, ndonëse ka shprehur gatishmëri për marrëveshje politike me subjektet tjera, ka bërë të qartë se nuk do të propozojë emër tjetër.
Përveç kryetarit, për konstituimin e plotë të legjislaturës së nëntë duhet të zgjidhen edhe pesë nënkryetarët e Kuvendit.
Vetëm pas përmbylljes së këtij procesi mund të procedohet me hapat e nevojshëm për formimin e Qeverisë së re.
Kriza politike e pas-zgjedhjeve ka ardhur si pasojë e mungesës së shumicës parlamentare nga ndonjë subjekt i vetëm dhe dështimit të deritanishëm për arritjen e një koalicioni funksional, shkruan Telegrafi.
LVV-ja ka dalë fituese me 48 ulëse, 13 më pak se minimumi prej 61 që kërkohet për të formuar një qeveri. Pas saj renditen PDK me 24 ulëse, LDK me 20, AAK-Nisma me 8 dhe Lista Serbe me 9.
Kreu i LVV-së dhe kryeministri në detyrë, Albin Kurti, ka deklaruar gjatë majit se është i gatshëm për kompromise dhe koncesione në funksion të formimit të ekzekutivit të ri.
Ai ka përmendur minoritetet dhe Nismën Socialdemokrate të Fatmir Limajt – e cila ka tri ulëse – si partnerë të mundshëm për bashkëqeverisje.
Në mungesë të marrëveshjes politike dhe zgjedhjes së kryetarit të Kuvendit, bllokada institucionale në Kosovë po vazhdon, me një klimë pasigurie për qytetarët dhe presion të shtuar ndërkombëtar për zgjidhje të ngërçit./Katror.info
