Presidentja e Kosovës, Vjosa Osmani, ka ndarë medalje presidenciale për nënat e Srebrenicës në kuadër të Forumit Ndërkombëtar për Gratë, Paqen dhe Sigurinë që po mbahet në Prishtinë.
Gjatë fjalës së saj ajo ka thënë se në Sebrenicë u masakruan më shumë se 8 mijë burra e fëmijë nga forcat gjenocidale të Millosheviqit, shkruan KOHA.
Sipas saj, nënat nuk kanë një varr ku do të vajtojnë të dashurit e tyre. Mirëpo sipas saj, përkundër kësaj dhimbjeje të pafund, nënat e Srebrenices njësoj si shumë nëna të Kosovës kanë vendosur të ngrehin zërin.
Mundesh me e lexu edhe…
“Ju jeni bërë zëri i atyre që nuk mund të flasin. Më çdo fotografi që e keni mbajtur në duart tuaja ju keni ruajtur kujtimin e gjallë. Të dashura nëna të Srebrenicës gjatë mandatit tim si presidente kam nderuar shpeshherë nënat e Kosovës që kanë shndërruar dhimbjen e tyre në forcë dhe asnjëherë nuk heshtën për të kërkuar drejtësi për fëmijët që humbën gjatë luftës. Sot kam nderin në emër të gjithë qytetarëve, në bazë të kompetencave kushtetuese që kam, nënave të Srebrenicës të ua dhuroj Medaljen Presidenciale për Shërbim”, ka thënë Osmani.
Ndërkaq përfaqësuesja e nënave të Srebrenicës ka thënë se kanë paraqitur të vërtetën para botës.
“Kemi luftuar për rezoluta në Asamblenë e Kombeve të Bashkuar që është shumë me rëndësi që gjenocidi të mbahet në mend. Nëse kam mbetur pa birin tim,… nuk kam mbetur pa krenari. I kemi hapur sytë e gjithë botës ndaj dinjitetit tonë njerëzor”, ka thënë ajo.
Ceremonia mblodhi personalitete të larta nga vendi dhe rajoni, përfshirë ministrin e Jashtëm të Bosnjë dhe Hercegovinës, Elmedin Konakoviq, i cili në fjalën e tij nënvizoi rëndësinë universale të luftës së nënave të Srebrenicës për drejtësi.
Ai i quajti këto gra një “busull morale për të gjithë ne” dhe një simbol global të përballjes me të kaluarën, jo me urrejtje, por me dinjitet dhe të vërtetë.
“Si ministër i Jashtëm i Bosnjës dhe Hercegovinës, sot ndihem thellësisht i nderuar që nënat e Srebrenicës janë fitueset e Çmimit për Gratë, Paqen dhe Sigurinë për këtë vit. Këto gra të guximshme kanë përjetuar dhimbjen më të thellë njerëzore, por e kanë shndërruar pikëllimin e tyre në një forcë të fuqishme për drejtësi, kujtesë dhe paqe. Ato kurrë nuk kanë kërkuar hakmarrje, vetëm të vërtetën. Zërat e tyre kanë kaluar kufijtë, duke i kujtuar botës se paqja nuk është e mundur pa drejtësi. Dhe kujtesa është një formë rezistence kundër mohimit. Trashëgimia e tyre nuk është vetëm boshnjake, ajo është universale. Ajo është një busull morale për të gjithë ne”.
“Nënat e Srebrenicës janë bërë një simbol global i dinjitetit dhe drejtësisë pas një prej kapitujve më të errët të Evropës. Përballë një humbjeje të paimagjinueshme, ato refuzojnë të heshtin. Në vend të urrejtjes, ato zgjedhin dinjitetin. Në vend të hakmarrjes, ato zgjedhin të vërtetën. Guximi i tyre vazhdon të ekspozojë mohimin, të kërkojë llogaridhënie dhe të frymëzojë brezat që të qëndrojnë kundër gjenocidit dhe padrejtësisë. Ato nuk janë vetëm zëri i Srebrenicës, ato janë ndërgjegjja e mbarë botës”, tha ai./Katror.info
