Me thuajse të gjithë skuadrën në dispozicion, Kombëtarja e Shqipërisë nisi zyrtarisht grumbullimin dhe përgatitjet për dy ndeshjet e qershorit në eliminatoret e Botërorit 2026.
Përfaqësuesja kuqezi do të luajë kundër Serbisë me 7 qershor në “Arenën Kombëtare” dhe tri ditë më pas në transfertën kundër Letonisë.
Për këto dy sfida të rëndësishme, Silvinjo ka ftuar 27 lojtarë, ndërsa 24 prej tyre zhvilluan të plotë programin stërvitor.
Mundesh me e lexu edhe…
Për shkak të impenjimit në fundjavë me ekipet e klubeve, Jasir Asani, Arlind Ajeti dhe Myrto Uzuni nuk u stërvitën me pjesën tjetër të ekipit. Ky i fundit zhvilloi një seancë të vecantë në palestër.
Pjesa tjetër e futbollistëve iu nënshtrua programit përgatitor, që përfshinte lojën me top si dhe situata të ndryshme loje në sulm dhe në mbrojtje.
Silvinjo dhe stafi teknik kuqezi do të shtojnë ngarkesën në seancat në vazhdim për të parë formën e secilit lojtar dhe më pas për të kristalizuar edhe idetë për formacionin që do të zbresë në fushë nga minuta e parë në ndeshjen kundër Serbisë.
Kombëtarja kuqezi do të vijojë përgatitjet në shtëpinë e futbollit, ndërsa të premten ka në program seancën e fundit në “Arenën Kombëtare” ku të shtunën do të luhet sfida ndaj Serbisë./EO
