Ambasadori i Britanisë së Madhe në Kosovë, Jonathan Hargreaves, ka zhvilluar vizitë në kuadër të ushtrimit ndërkombëtar “Defender Europe 25”, i cili këtë vit po mbahet në Kosovë si nikoqire.
Në një postim në rrjetet sociale, ambasadori Hargreaves ka vlerësuar lart performancën e Forcës së Sigurisë së Kosovës (FSK), duke theksuar ndërveprueshmërinë e saj me forcat aleate nga Shtetet e Bashkuara të Amerikës, Shqipëria, Kroacia, Maqedonia e Veriut dhe Bullgaria.
“Sot vizitova ushtrimin DEFENDER EUROPE 25, ushtrimi vjetor më i madh i Ushtrisë Amerikane. Ky ushtrim demonstroi aftësinë e Forcës së Sigurisë së Kosovës për të bashkëpunuar me forcat nga SHBA, Shqipëria, Kroacia, Maqedonia e Veriut dhe Bullgaria në vendosjen strategjike të forcave, duke treguar ndërveprueshmërinë mes aleatëve dhe partnerëve të NATO-s”, ka shkruar ambasadori britanik.
Mundesh me e lexu edhe…
Gjatë vizitës së tij, Hargreaves është ndalur edhe te përvoja e një pjestarje të FSK-së, e cila ka ndjekur Akademinë Mbretërore Ushtarake Sandhurst në Britaninë e Madhe.
Ai ka theksuar rëndësinë e këtyre trajnimeve në forcimin profesional të pjesëtarëve të FSK-së.
“Ishte gjithashtu kënaqësi të takohesha me alumnen e 30-të të FSK-së nga Akademia Mbretërore Ushtarake Sandhurst në Mbretërinë e Bashkuar. Diskutuam për ato që ka mësuar në Britani dhe mënyrën si po i përdor ato sot për të sjellë ndryshime në FSK, ndërsa ajo zhvillohet si një forcë e sigurisë e përafruar me standardet e NATO-s”, është shprehur ambasadori.
Ushtrimi “Defender Europe 25” përfshin mijëra trupa nga vende të ndryshme dhe synon të forcojë gatishmërinë, ndërveprimin dhe kapacitetin e përbashkët mbrojtës të forcave aleate në rajon./Telegrafi/Katror.info
