Kosova ka shënuar një sukses të rëndësishëm në fushën e përfshirjes së të rinjve në politikë, duke lënë pas shtetet e rajonit dhe Turqinë, sipas Indeksit të Pjesëmarrjes së të Rinjve në Politikë, Jetën Sociale dhe Ekonomike për vitin 2023, të prezantuar sot nga Demokraci për Zhvillim (D4D) në një konferencë për media, shkruan Katror.info.
Sipas të gjeturave të raportit, të rinjtë e Kosovës po tregojnë një nivel të lartë angazhimi në jetën politike, me përfaqësim më të mirë në institucione si Kuvendi, krahasuar me vendet fqinje. Kjo tregon një vetëdije të rritur dhe dëshirë në rritje për të kontribuar në drejtimin dhe të ardhmen e vendit.
“Ne indeksin e politikës, Kosova qëndron më mirë në krahasim me shtetet e rajonit, por edhe me Turqinë,” deklaroi Ferid Murseli nga D4D gjatë prezantimit të raportit. Kjo arritje konsiderohet një tregues pozitiv për gjeneratat e reja dhe një sinjal inkurajues për përfshirjen më të madhe të rinisë në proceset vendimmarrëse.
Mundesh me e lexu edhe…
Rrezart Krasniqi, drejtor ekzekutiv i D4D, theksoi rëndësinë e bashkëpunimit ndërmjet institucioneve dhe shoqërisë civile për të adresuar sfidat e tjera me të cilat përballen të rinjtë, veçanërisht në fushën e arsimit dhe punësimit. Megjithatë, ai vlerësoi se përfshirja në politikë është një pikë e ndritur që tregon potencialin transformues të rinisë në Kosovë.
Ky progres në pjesëmarrjen politike të të rinjve në Kosovë jo vetëm që përfaqëson një sukses vendor, por ofron edhe një shembull frymëzues për vendet tjera të rajonit në fuqizimin e brezave të rinj./Katror.info
