Agjencia e Kosovës për Akreditim (AKA) ka pritur sot një delegacion nga Agjencia për Cilësi në Arsimin e Lartë të Maqedonisë së Veriut, në kuadër të forcimit të bashkëpunimit rajonal për zbatimin e standardeve evropiane për sigurimin e cilësisë (ESG) në arsimin e lartë.
Delegacioni nga Maqedonia e Veriut, i kryesuar nga znj. Hristina Serafimovska, drejtoreshë e Agjencisë për Cilësi, përfshinte z. Agim Ramadani, këshilltar shtetëror për arsimin e lartë; z. Ahmed Qazimi, udhëheqës i Sektorit për Arsimin e Lartë; dhe znj. Lupka Nedelkovska, këshilltare për arsimin e lartë.
Nga pala kosovare, delegacioni i AKA-së udhëhiqej nga drejtori i përgjithshëm, z. Naim Gashi, dhe përfshinte z. Shkëlzen Gërxhaliu, drejtor për Monitorim dhe Procedura Pasakredituese; znj. Shpresa Shala, znj. Lenda Hyseni, z. Milot Hasangjekaj dhe zyrtarja Leona Barbatovci.
Mundesh me e lexu edhe…
Drejtori Gashi prezantoi para homologëve maqedonas të arriturat e AKA-së në zhvillimin institucional, përfshirë miratimin e legjislacionit të ri, përforcimin e infrastrukturës, shtimin e stafit profesional dhe avancimin e tyre sipas standardeve ESG. Ai theksoi rëndësinë e zbatimit të rekomandimeve të ENQA për të garantuar cilësi të qëndrueshme në arsimin e lartë.
AKA shprehu gatishmërinë për të ndarë përvoja dhe praktika të mira me Maqedoninë e Veriut, duke synuar një qasje të përbashkët dhe të harmonizuar me standardet evropiane në rajon.
Drejtoresha Serafimovska e vlerësoi punën e AKA-së, duke deklaruar: “Si lidere në rajon në përmbushjen e standardeve ESG, AKA përbën një shembull që duhet ndjekur. Ndihma dhe bashkëpunimi i tyre janë thelbësorë për avancimin e cilësisë së arsimit të lartë në vendin tonë.”
Gjatë vizitës, delegacioni nga Maqedonia e Veriut pati mundësinë të shohë nga afër ambientet e AKA-së dhe të zhvillojë diskutime me stafin mbi proceset e sigurimit të cilësisë dhe ndarjen e përgjegjësive në kuadër të sistemit të akreditimit.
Takimi përmbylli një hap të rëndësishëm drejt integrimit të mëtejshëm të përpjekjeve rajonale për cilësi të lartë në arsimin e lartë dhe përgatitjen për sfidat e ardhshme në përputhje me standardet evropiane./Katror.info
