Kryetari i Odës Ekonomike të Kosovës, Lulzim Rafuna, ka paralajmëruar se bizneset dhe punëtorët do të protestojnë të mërkurën, më 11 qershor, nëse Qeveria nuk reflekton lidhur me vendimin për daljen në tregun e lirë të energjisë elektrike.
Në një konferencë për media pas takimit me përfaqësues të bizneseve, Rafuna theksoi se kërkesa kryesore e komunitetit të biznesit është vendosja e një faze tranzicioni para kalimit në tregun e lirë. Ai shtoi se mungesa e përgatitjes dhe e një pakete mbështetëse po rrezikon seriozisht funksionimin e shumë bizneseve.
“Nëse nuk ka reflektim nga qeveria, të mërkurën në ora 12:00 do të dalim në protestë në shesh, bashkë me punëtorët, për të shprehur pakënaqësinë me këtë vendim dhe mosreagimin institucional”, deklaroi Rafuna.
Mundesh me e lexu edhe…
Ai i bëri thirrje institucioneve që të shmangin përshkallëzimin e situatës dhe të dëgjojnë zërin e komunitetit të biznesit, duke theksuar rëndësinë e një zgjidhjeje të përbashkët dhe të menaxhueshme për këtë çështje.
Përfaqësues të bizneseve ngritën shqetësimin për ndikimin negativ të çmimeve të larta të energjisë në sektorin prodhues, duke alarmuar për rrezikun e mbylljes së fabrikave dhe humbjes së vendeve të punës. Disa biznese raportuan edhe kërcënime nga KEK për ndërprerje të furnizimit me energji.
Kryetari i Aleancës Kosovare të Bizneseve, Agim Shahini, tha se mbi 1,300 kompani dhe rreth 143 mijë punëtorë janë të prekur drejtpërdrejt. “Me këtë protestë synojmë të tregojmë se jemi goditur rëndë nga ky vendim. Bizneset, prodhuesit, shërbyesit nuk mund ta përballojnë këtë rritje të çmimeve”, theksoi ai.
Ndërkohë, Arian Zeka, kryetar i Odës Ekonomike Amerikane në Kosovë, solli si shembull negativ rastin e Feronikelit, i cili është detyruar të ndalojë plotësisht prodhimin për shkak të liberalizimit të tregut pa përgatitje. “Mbi 300 punëtorë kanë mbetur pa punë në një komunë të varfër të vendit. Rasti i Feronikelit është tregues i qartë i pasojave të vendimeve të ngutshme”, tha Zeka.
Komuniteti i biznesit i bën thirrje Qeverisë së Kosovës dhe Zyrës së Rregullatorit për Energji (ZRrE) që të ndërmarrin masa të menjëhershme për të adresuar kërkesat e tyre dhe për të shmangur një krizë të thellë ekonomike./Katror.info
