Në 26-vjetorin e Çlirimit të Kosovës, Presidentja e vendit ka shprehur mirënjohjen dhe krenarinë kombëtare për sakrificën dhe qëndresën që sollën lirinë, duke e përkujtuar këtë ditë historike me fjalët: “Kosova e lirë, përjetë krenare!” shkruan Katror.info.
Presidentja kujtoi 12 qershorin e vitit 1999 si ditën kur mbi tokën e djegur të Kosovës zbarkoi shpresa. Me hyrjen e 50 mijë trupave të NATO-s, vendi i stërmunduar pa për herë të parë pas shumë dekadash dritën e lirisë. Ajo theksoi se kjo ditë vulosi kthimin e më shumë se një milion shqiptarëve në shtëpitë e tyre dhe fitoren mbi shtypjen shekullore.
“Luftëtarët e Ushtrisë Çlirimtare të Kosovës dhe ushtarët e NATO-s e kthyen tmerrin në guxim dhe dhimbjen në shpresë. Në atë ditë historike, ata sollën dritë pas një errësire të gjatë dhe e bënë lirinë realitet,” theksoi Presidentja në deklaratën e saj.
Mundesh me e lexu edhe…
Ajo hodhi poshtë çdo përpjekje për të shtrembëruar të vërtetën historike, duke theksuar se “një histori e shkruar me gjak nuk mund të ndryshohet e as fshihet nga gënjeshtra të shkruara me laps.”
Në përmbyllje të reagimit, Presidentja përçoi mesazhin e vendosmërisë së përjetshme të popullit të Kosovës për të ruajtur lirinë dhe dinjitetin kombëtar: “Kosova e lirë, e pavarur, demokratike, e përjetshme! Sepse përjetësinë ia dhanë dëshmorët e martirët e lirisë!”/Katror.info
