Komuna e Prishtinës ka bërë një hap konkret për ndërtimin e atij që e quan Lice Artistik, ku do t’i bëhet vendi edhe shkollës së mesme të lartë të muzikës “Prenk Jakova”. “Ndërtimi i Liceut Artistik-Ndërtesa kryesore” mban titullin thirrja publike për kompanitë që ia mësyjnë ndërtimit të këtij objekti.
Vlera e parashikuar është 8.5 milionë euro. Kërkesat për hapësirë adekuate të shkollës së mesme të lartë të muzikës “Prenk Jakova” janë të kahershme. E ndërtesa e re pritet të zërë vend krejt afër qendrës së kryeqytetit. Thirrja që do të jetë e hapur deri në ditën e 30 qershorit mendohet të konkretizohet me nënshkrim të kontratës dhe guri themeltar i ndërtesës të vihet në vjeshtë të këtij viti.
Komuna ka kohë që thotë se projekti ekziston dhe synimet janë që ndërtimi të bëhet afër ndërtesës së Qeverisë, ish-pallatit të shtypit “Rilindja”. Për objekt shkolle më herët ishin përmendur edhe lokacione të tjera, madje qe vënë edhe gur themeltar.
Drejtori i Drejtorisë së Arsimit në kryeqytet, Samir Shahini, i cili ka marrë detyrën në prill, ka treguar se në kuadër të Liecut fillimisht do të vendoset shkolla ‘Prenk Jakova’. Sikurse në prill, kur kishte paralajmëruar inicimin e procedurës së tenderimit, ka thënë se deri tash projekti ka mbetur peng i lokacionit. Sipas tij, mbetet që deri në vjeshtë Drejtoria e Pronave ta zgjidhë çështjen e lokacionit.
“Por ne po iniciojmë procedurën që të mos humbim kohë. Mandej është Drejtoria e Pronës që duhet ta bëjë lirimin e hapësirës. Synimi ynë real është që të nisë puna në shtator. Parashikohet që në shtator të vendoset guri themeltar”, ka përsëritur ai. Sipas Shahinit, Liceu do t’i shërbejë shkollës “Prenk Jakova”, asaj të arteve dhe do të ketë sallë multifunksionale që shkon përtej një salle të shkollës së muzikës.
“Kostoja totale e objektit është 8.5 milionë sipas parashikimit, por mund të ketë plotësime. Veç për këtë vit janë të ndara 500 mijë euro. Nëse nisin punimet në shtator, me këto mjete mund të kryhen goxha punë”, ka thënë ai.
Premtimet për ndërtesë të re për “Prenk Jakovën” janë të vjetra. Njëri prej tyre edhe ai i nëntorit të vitit 2012, kur objekti i shkollës “Prenk Jakova”, sipas autoriteteve komunale, “nisi” të ndërtohej në “Kodër të Diellit”, përballë shkollës fillore “Ismail Qemali”.
“Sivjet do të vazhdojmë medoemos me lokacionin dhe me fillimin e ndërtimit të shkollës, sepse nuk mund të presim më”, kishte thënë në janarin e vitit 2016 kryetari i atëhershëm i Prishtinës, Shpend Ahmeti, kur shkollën e zhvendosur në objektin e “Ali Sokolit” do ta vizitonte bashkë me Arbërie Nagavcin, asokohe drejtoreshë e Arsimit në Komunë e tash e më shumë se katër vjet ministre e Arsimit, Shkencës, Teknologjisë dhe Inovacionit. Shkolla për më shumë se 8 vjet është njëfarë zgjatimi i shkollës së mesme të mjekësisë “Ali Sokoli”. Funksionon në një aneks të saj. Më herët mësimet zhvilloheshin në ish-objektin e shkollës së ekonomisë “Hoxhë Kadri Prishtina”.
Orkestra dhe Kori i “Prenk Jakovës” në prill kanë mbajtur koncertin me të cilin kanë shënuar 75-vjetorin e themelimit. Shkolla nisi të punonte më 1950.
Drejtoresha e “Prenk Jakovës”, Jeta Dida-Bujari, kishte thënë se si institucion nuk ankohen, por synim e kanë punën. Por, kishte shtuar se është realitet që mungon ndërtesa e Filharmonisë, ajo e Fakultetit të Arteve dhe ajo e Shkollës së Muzikës.
“Kështu që inkurajoj të gjithë politikëbërësit që të mendojnë për këtë fakt që është dashur të përmbushej gjithsesi”, kishte thënë ajo, shkruan Koha.net. Ka shtuar se gjithmonë besojnë se kjo shkollë do ta ketë ndërtesën e vet më në fund, sepse kryeqyteti e meriton jo veç një shkollë të muzikës.
“Nuk na mjafton vetëm një shkollë e muzikës. Kemi aq shumë talente të interesuara që për shkak të mungesës së objektit nuk kemi mundësi t’i pranojmë në shkollën tonë. Inkurajoj që menjëherë të iniciohet edhe shkolla e dytë shkaku i rrethanave”, kishte thënë ajo.
Koncerti qe premtues se talentet e reja kanë të ardhme të sigurt në aspektin profesional.
Lirjona Sylejmani, dirigjente e koncertit, njëherësh mësimdhënëse në “Prenk Jakova”, kishte thënë se mbetet me shpresën që kjo është hera e fundit që u premtohet një objekt shkolle.
“Shpresoj që kësaj radhe vërtet të ndërtohet. Nëse ndërtohet ashtu si është plani, do të ishte hapësirë e duhur. Është një lice me shumë drejtime. Kam qenë në grupin punues ku kemi treguar nevojat. Unë kam treguar për sallat e korit dhe orkestrës. Arkitektët kanë qenë shumë të vëmendshëm”, kishte thënë ajo. Sipas Sylejmanit, nëse realizohet ashtu siç kanë thënë autoritetet komunale, do të ishte e lumtur pasi nxënësit do të ushtrojnë në salla të duhura.
“Po ta kishin një sallë që duhet, këta do të shkëlqenin edhe më shumë”, kishte thënë ajo. Projektet kapitale në Komunën e Prishtinës tradicionalisht zvarriten gjatë. Se si do të ecet me ndërtesën e paraparë për lice artistik mbetet të shihet./Katror.info
