Një studim i fundit i publikuar në revistën Frontiers in Psychology ka hulumtuar ndikimin e zakoneve të ushqimit në cilësinë e gjumit dhe përmbajtjen e ëndrrave. Sipas rezultateve, 40.2% e pjesëmarrësve raportuan se ushqimi që konsumojnë ka ndikuar në mënyrën e gjumit të tyre.
Studimi u bazua në të dhënat online të 1082 studentëve, të cilët ndanë përvojat e tyre nga janari deri në prill të vitit 2023. Ata u pyetën për efektet e disa grupeve ushqimore, përfshirë produktet e qumështit, ëmbëlsirat, frutat dhe mishin.
Rreth 25% e pjesëmarrësve deklaruan se të paktën një nga këto grupe ushqimesh ua ka bërë gjumin më të parehatshëm, ndërsa afërsisht 20% thanë se ushqimet e caktuara ua kanë përmirësuar cilësinë e gjumit. Në grupin e ushqimeve që ndikojnë negativisht u përfshinë kryesisht ëmbëlsirat, ushqimet pikante dhe produktet e qumështit, përfshirë jogurtin dhe djathin. Ndërkaq, frutat, çajet bimore dhe perimet u lidhën me një gjumë më të mirë.
Mundesh me e lexu edhe…
Sa i përket ëndrrave, vetëm 5.5% e të anketuarve raportuan ndikim të ushqimit në to. Makthet lidhen më së shumti me konsumimin e ushqimeve të ëmbla (rreth 31%) dhe produkteve të qumështit (22%).
Autorët e studimit theksuan se, megjithëse nuk ka ende prova përfundimtare për lidhjen mes ushqimit dhe ëndrrave, rezultatet përputhen me studime të mëparshme që tregojnë se ushqimi mund të ndikojë në gjumë.
Sipas tyre, lidhja mes produkteve të qumështit dhe ëndrrave të parehatshme mund të shpjegohet me shqetësimet gastrointestinale, sidomos tek personat me intolerancë ndaj laktozës. Simptoma si fryrja, ngërçet dhe gazrat, të shkaktuara nga disa ushqime, mund të ndikojnë negativisht në cilësinë e ëndrrave.
Ky studim shton njohuritë mbi mënyrën sesi zakonet tona ushqimore ndikojnë në cilësinë e gjumit dhe përvojën e ëndrrave. /Katror.info
Përgatiti:
