Autoritetet shqiptare kanë dhënë miratimin për hapjen zyrtare të pikës kufitare në Aeroportin Ndërkombëtar të Vlorës (VIA), duke e bërë të mundur qarkullimin ndërkombëtar të pasagjerëve vendas dhe të huaj përmes kësaj porte të re ajrore.
Kjo masë e cila është marrë të mërkurën, është pjesë e një procesi më të gjerë për përgatitjen operacionale të aeroportit dhe pason me sukses fluturimin certifikues të kryer më 8 maj 2025, që vërtetoi përmbushjen e standardeve ndërkombëtare për pranimin e linjave ajrore.
Si një nga projektet kryesore infrastrukturore në Shqipëri, Aeroporti i Vlorës pritet të luajë rol kyç në nxitjen e turizmit dhe zhvillimit ekonomik, duke ofruar një hyrje të re ajrore për vendin, veçanërisht për zonat jugore.
Mundesh me e lexu edhe…
I pozicionuar strategjikisht pranë destinacioneve të njohura bregdetare, aeroporti synon të tërheqë mijëra vizitorë në vit dhe të përforcojë interesin për investime të huaja direkte në rajon./Katror.info
