Administrata Tatimore e Kosovës (ATK) ka arritur të mbledhë gjithsej 713.3 milionë euro të hyra në periudhën janar–gusht 2025, duke shënuar një rritje prej 71.2 milionë eurosh krahasuar me të njëjtën periudhë të vitit 2024, shkruan Katror.info.
Ky rezultat reflekton një trend të qëndrueshëm rritjeje të të hyrave tatimore, që sipas ATK-së, është pasqyrim i përkushtimit të saj për zbatimin e ligjit, forcimin e administrimit tatimor, si dhe i vetëdijes gjithnjë e më të lartë të tatimpaguesve për përmbushjen e obligimeve.
Rritja e të hyrave ka rëndësi të veçantë për stabilitetin fiskal të vendit, duke siguruar më shumë mjete për investime publike, zhvillim ekonomik dhe përmbushjen e nevojave të qytetarëve. ATK thekson se partneriteti i ndërtuar me tatimpaguesit po jep rezultate të prekshme dhe afatgjata.
Mundesh me e lexu edhe…
Institucioni rikujton se qëllimi i tij nuk është ndëshkimi, por edukimi dhe ndërgjegjësimi i tatimpaguesve, duke i trajtuar obligimet tatimore si një përgjegjësi qytetare dhe biznesore. Në këtë drejtim, ATK do të vazhdojë të investojë në trajnime, fushata informuese dhe shërbime digjitale që e bëjnë procesin e përmbushjes së detyrimeve më të thjeshtë për qytetarët dhe bizneset./Katror.info
