Për gjashtë ditë të mbushura me energji, aktivitete, filma të shkurtër e të gjatë, konferenca, takime dhe atmosferë festive, Festivali Ndërkombëtar i Filmit në Prishtinë – PriFest – shndërroi sheshin e kryeqytetit në një hapësirë ku arti dhe publiku u ndërthurën ditë e natë.
Kryeqyteti u mbush me kineastë, aktorë, producentë e dashamirës të filmit nga vende të ndryshme të botës, të cilët sollën jo vetëm krijimet e tyre, por edhe energji, ide dhe diskutime të reja.
Edicioni i 17-të arriti kulmin të dielën mbrëma me ceremoninë e mbylljes.
Mundesh me e lexu edhe…
“Kjo është java kulmore e punës tonë, i grupit të madh të njerëzve që jemi në organizatën PriFest edhe disi nuk e dimë ende është sa po mbaroi, por ajo që pashë ditëve të fundit është se kishte më shumë njerëz, më shumë mysafirë, më shumë publik, dhe një atmosferë më të relaksuar e më të mirë. Mendoj që e përmbyllëm me faqe të bardhë,” u shpreh për Katror Media, regjisori Fatos Berisha, drejtor i Festivalit.
Natën e fundit publiku pati rastin të shohë filmin “Man of the House” të regjisorit shqiptar Andamion Murataj, një prodhim që trajton fenomenin e burrneshave në trojet shqiptare.
“Ka qenë një proces goxha kompleks në realizimin e tij, por unë jam shumë i kënaqur me produktin final, si edhe me procesin në tërësi. Ka qenë dëshirë personale që ky film të shfaqej në PriFest, sepse mendoj që ky festival është vendi i duhur ku mund të matesh me filma të tjerë dhe një hapësirë e mirë për promovim,” theksoi producenti i filmit, Ismet Sijarinaj.
Aktorët e filmit ndanë përvojën e tyre në këtë projekt sfidues, duke nënvizuar rëndësinë e pjesëmarrjes në një festival si PriFest.
“PriFest është shumë i dashur për ne. Është me vulën e Vjosës tonë dhe është shumë emocionues, ” thotë aktorja Drita Kaba Karaga.
Mua më pëlqeu shumë filmi, dëshiroj kur të rritem të bëhem aktore dhe këtë eksperiencë nuk do ta harroj kurrë,” thotë vogëlshja, Alesia Ruci..
Përshtypjet për filmin i ndau edhe kryetari i Prishtinës, Përparim Rama, duke e cilësuar PriFest-in si një pasuri për qytetin:
“Falënderoj edhe një herë PriFest-in, sepse çdo vit na sjell emocione, tregime të reja dhe na bashkon me kultura e tradita të ndryshme, sepse ky film ishte një ko-produksion i shumë vendeve dhe keshtu gjejmë talentë të mrekullueshëm.”
Pas shfaqjes së filmit, mbrëmja vazhdoi me ceremoninë solemne të ndarjes së çmimeve, ku fituesit u shpallën mbi bazën e vlerësimit të jurisë profesioniste:
- Çmimi kryesor “Vjosa Berisha” iu nda filmit Cycle të regjisorit Erkan Taguzollu dhe u dorëzua nga kryeministri Albin Kurti.
- Çmimi për regjisorin më të mirë iu nda regjisorit Dino Mustafiq.
- Çmimi për filmin më të mirë të mesëm iu nda filmit Two Strangers.
- Çmimi për filmin më të mirë të shkurtër shkoi për filmin Three Keenings.
- Çmimi për aktorin më të mirë e mori Stojan Dojcev.
- Çmimi për aktoren më të mirë iu dha Arta Dobroshit.
Me këtë ceremoni, edicioni i shtatëmbëdhjetë i PriFest-it mbylli dyert, duke lënë pas një përvojë të paharrueshme në Prishtinë dhe një gjurmë të fortë te audienca ndërkombëtare./Katror.info
