Nëse ju është dukur se çokollata këtë vit kushton më shumë, nuk jeni të vetmit. Sipas të dhënave nga Groundwork Collaborative, çmimi i ëmbëlsirave të Halloween-it në vitin 2025 pritet të rritet me 10.8% krahasuar me vitin e kaluar.
Një pjesë e kësaj rritjeje lidhet me tarifat tregtare që Shtetet e Bashkuara kanë vendosur ndaj disa vendeve prodhuese të kakaos, përfshirë Bregun e Fildishtë – furnizuesin më të madh në botë.
Por arsyeja kryesore fshihet më thellë: sëmundjet që po dëmtojnë bimën e kakaos, shkruan ERN, transmeton Katror.info.
Sipas Departamentit Amerikan të Bujqësisë, deri në 40% e kokrrave të kakaos humbasin çdo vit për shkak të patogjenëve, veçanërisht kërpudhës Phytophthora, që shkakton sëmundjen e njohur si “black pod” ose kapsulës së zezë.
Kjo sëmundje prek frutat e kakaos gjatë periudhave me reshje të dendura, duke i mbuluar me njolla të zeza dhe duke i bërë të papërdorshme.
Për të shpëtuar njëren prej kënaqësive më të dashura të njerëzimit, shkencëtarët në Universitetin Penn State kanë ndërmarrë një hap revolucionar: modifikimin gjenetik të bimës së kakaos për ta bërë rezistente ndaj sëmundjeve.
Në një studim të publikuar në Plant Biotechnology Journal në vitin 2025, ekipi i udhëhequr nga profesori Mark Guiltinan njoftoi se kishte përdorur teknologjinë CRISPR-Cas9 për të ndryshuar gjenin TcNPR3 – gjen që normalisht “pengon” sistemin imunitar të bimës.
Mundesh me e lexu edhe…
Duke e çaktivizuar këtë gjen, studiuesit krijuan bimën e parë jo-transgjenike të kakaos, e cila tregoi 42% më pak dëmtime nga sëmundjet.
Nëse metodat tradicionale të përmirësimit të varieteteve të kakaos kërkojnë vite të tëra, inxhinieria gjenetike mundëson rezultate shumë më të shpejta dhe të sakta.
Edhe pse ky zbulim nuk do të ulë menjëherë çmimin e çokollatës, ai mund të ngadalësojë rritjen e kostove të prodhimit dhe të ndihmojë fermerët të mbrojnë të korrat nga humbjet masive.
Tregu global i çokollatës, me vlerë miliarda dollarë, ende ka arsye për optimizëm – dhe adhuruesit e çokollatës mund të vazhdojnë ta shijojnë, të paktën për tani, këtë “kënaqësi të ëmbël” me përfitime edhe për shëndetin. /Katror.info
Burimi: Europe Right Now (ERN)
Përktheu dhe përshtati: Katror.info
