Valbona Sadiku është një shembull i shkëlqyer i aktivizmit qytetar, e cila në muajin tetor të sensibilizimit për kancerin e gjirit ka nisur një nismë humanitare për të mbështetur gratë e prekura nga kjo sëmundje.
E prekur vetë nga kanceri i gjirit, Valbona ka përdorur përvojën dhe forcën e saj për të krijuar kauza sensibilizuese, si dhe duke ngritur zërin për gratë e prekura me kancer të gjirit.
Kësaj radhe ka ndërmarrë një nismë të veçantë, ku gratë ndërmarrëse kontribuojnë duke shitur ushqime të përgatitura prej tyre dhe të gjitha të ardhurat shkojnë për gratë që po luftojnë me kancerin e gjirit.
Mundesh me e lexu edhe…
”Duke e pasë parasysh që në momente të caktuara e sheh sa e rëndësishme apo sa e nevojshme është mbështetja financiare në këtë sfidë, apo edhe në këtë luftë për me fitu betejën, e kemi konsideru që pak, ti domethënë t’ju lehtësojmë, po ndoshta e gjithë kjo është më shumë me tregu mbështetjen, morale edhe me ju tregu që të gjithë jemi së bashku, edhe në këtë luftë jemi të gjithë bashkë. Janë tri vite që vetë, domethënë në mënyra të ndryshme, kam ofruar ndihmë, apo edhe e kam ngritë zanin për gratë të mbijetuara të kancerit, këtë herë e kemi mendu, domethënë me bo një iniciativë si kjo sepse në një farë forme ti edhe e promovon edhe punën vullnetare, e promovon angazhimin, aktivizmin qytetar, po pse jo, domethënë, të rriten edhe fëmijët tanë tu e pa që mbështetja është e domosdoshme”, shprehet Valbona.
Nisma e Valbonës është përqafuar nga shumë gra që përballen me të njëjtën sfidë, duke formuar një rrjet mbështetjeje që frymëzon guxim dhe shpresë. Përmes këtij bashkëpunimi të ngushtë, gratë kanë krijuar një lidhje solidariteti, duke ndarë jo vetëm përvojat e tyre, por edhe fuqinë për të kontribuar për njëri-tjetrën. Veç tjerash ato kanë ofruar gatimet e tyre tradicionale si një mënyrë për të mbledhur fonde për këtë pjesë të shoqërisë sonë.
”Kjo nismë ka filluar domethënë nga të mbijetuarat e kancerit si të solidarizohemi njëra për tjetrën pasi që neve e kemi prekë dhe e dimë sa e rëndësishme është mbështetja e shoqërisë së komunitetit e të gjithëve. Më pastaj, domethënë këtij, kësaj iniciative ju ka bashkëngjitë Grupi i Grave Ndërmarrëse, domethënë, ky ka qenë hapi i parë e pas kësaj na u kanë bashkëngjitë institucionet na u kanë bashkëngjitë shumë organizata, qytetarë, vullnetarë, aktivistë që jetojnë në Mitrovicë po patjetër që kemi, domethënë edhe biznese, korporatën Rugova e cila edhe sot po na mbështet, domethënë në aktivitetin që e kemi nisë. Duke e pasë parasysh që në organizatë jemi gra të cilat vijmë nga fusha domethënë nga të gjitha fushat edhe tu e di që shumica janë nëna, gatimet i përgatisim edhe për familjet tona, edhe e kemi mendu që gatimet e kanë një kosto, e cila mundemi me ardh më shpejt tek shitja dhe me grumbullu më shumë fonde. Unë muj me thonë që gratë e Mitrovicës janë gra shembull për të gjithë Kosovën dhe rajonin. Tek ne vetëm mjafton, domethënë me u përmend një gjë, kurse bashkëngjitemi të gjithë, nuk hezitojmë. Qysh e ceka kemi gra të fushave të ndryshme që domethënë nuk kanë biznese të pasqyrisë, mirëpo të gjitha sot kanë gatu edhe ju kam bashkëngjitë iniciativës sonë”, thotë ajo.
Kauza e Valbonës ka fituar përkrahjen jo vetëm të grave të zonës, por edhe të organizatave dhe institucioneve që janë bashkuar për të dhënë mbështetje të mëtejshme. Kjo nismë e ka forcuar edhe më shumë ndërgjegjësimin për kancerin e gjirit dhe ka krijuar një valë aktivizmi dhe sensibilizimi që ka përfshirë të gjithë komunitetin.
”Fillimisht, ndoshta neve kur e kemi fillu, kam mendu që kanë me na u bashkëngjitë disa kolege, pesë-gjashtë shoqe, po nuk e kam pritë që kanë m’u bashkëngjitë afër njëqind gra domethënë sot afër njëqindë gra kanë gatu dhe i kanë sjellë, përveç grave kanë gatu, dhe nga institucione si komuna Policia, Bashkësia Islame, shoqatat turke, gjitha domethënë organizatat apo edhe të gjithë ata që jetojnë dhe bashkëveprojnë në MitrovicëKëtë iniciativë domethënë e kanë mbështetë gratë dhe vajzat po asnjëherë mos të harrojmë që një koqir i kësaj mbështetje është vetë Komuna e Mitrovicës, Drejtoria e Shëndetësisë e cila domethënë udhëhiqet nga një burrë, mirëpo që në çdo hap këtë iniciativë edhe sot e ka mbështet aktivitetin tonë”, shprehet ajo.
Mesazhi i Valbonës për të gjithë të prekurit me kancer është të mos dorëzohen dhe të qëndrojnë të forta në luftën kundër kësaj sëmundjeje, ndërsa bënë thirrje për kujdes që të gjithë të kihen parasysh kontrollat e vazhdueshme.
”Fillimisht ndoshta një mesazh kisha me e përcjell për të gjitha gratë dhe vajzat po kjo sëmundje nuk kalon pa i prekë edhe burrat e djemtë! Kisha dash me e përcjell që me u kontrollu me pasë kontrolla me vonamografin, EHOT, analizat, edhe me parandalu domethënë sëmundjen, sepse çdo parandalim është edhe shërim. Të mbijetuarave të kancerit vetëm forcë, vullnet, sepse shpirti luftarak i secilës ka me i bo gratë edhe më të forta edhe kjo domethënë ë neve na ndihmon me ecë para”, përfundon ajo.
Kauza si kjo, përveç aktit bamirës, ka krijuar një uniteti shoqëror, dhe ka shfaqur përpjekje për të treguar fuqinë e solidaritetit dhe për të ndihmuar njëra-tjetrën në krijimin e ndryshimeve të mëdha në komunitet. /Katror.info
Edicionin #65 të plotë e gjeni këtu! 🙂
Përgatiti:
