A mund të jetë inteligjenca artificiale një aleat i dobishëm? Ja si po ndihmon në përpjekjet për ruajtjen e mjedisit kur bëhet fjalë për pyjet, ushqimin, tokën dhe detet.
AI po përjeton një moment të rëndësishëm. Mediat flasin vazhdimisht për të, miliarderët e teknologjisë kanë fituar shuma të mëdha prej saj, dhe politikanët po përpiqen të tregojnë se e kuptojnë atë – dhe se dinë çfarë të bëjnë. Historitë që ngjallin frikë janë të shumta, por ka edhe një anë më pozitive të kësaj teknologjie. Ajo premton të ofrojë zgjidhje praktike për disa sfida të vështira, shkruan Positive News.
Këtu janë katër mënyra se si AI tashmë po bën një ndryshim pozitiv.
Mundesh me e lexu edhe…
1) E ardhmja e pyjeve
Pyjet tropikale të Amerikës së Jugut janë nën kërcënim, por hapësirat e tyre të mëdha dhe të largëta e bëjnë të vështirë monitorimin e këtyre kërcënimeve. Monitorimi me satelit është një opsion, por ka kufizime, ndërsa patrullimet tokësore mund të mbulojnë vetëm një sipërfaqe të vogël. Këtu hyjnë në lojë dronët. Pajisur me kamera të sofistikuara dhe sensorë të lëvizjes, ata mund të fluturojnë pothuajse në heshtje mes kurorave të pemëve, duke zbuluar shenja të prerjeve të paligjshme apo ndërhyrjeve të tjera. AI analizon të dhënat e tyre brenda sekondave dhe siguron raporte në kohë reale për kërcënime të mundshme, duke mundësuar ndërhyrje të menjëhershme.
Në Amazonën Peruviane, aktivistët indigjenë po përdorin një version të personalizuar të softuerit MapBuilder për të krijuar një pasqyrë të detajuar të gjendjes së pyjeve të tyre, duke kombinuar të dhënat satelitore me vëzhgimet nga patrullat e tyre. Kjo ndihmon komunitetet lokale të adresojnë sfidat me fakte të padiskutueshme.
2) AI dhe mbrojtja e kafshëve të egra
Speciet më të rrezikuara dhe më të çmuara shpesh janë më të vështirat për t’u gjetur – njësoj si kërcënimet që përballen. AI mund të ndihmojë në gjurmimin e tyre dhe të rreziqeve që i prekin. Në Indi, përmes analizimit të fotove nga kurthet fotografike, janë ndërtuar baza të dhënash të detajuara për tigra individualë, duke mundësuar gjurmimin e paligjshmërisë në tregun ndërkombëtar.
Në Ugandë dhe Afrikën e Jugut, rangerët po përdorin dronë dhe mjete të bazuara në AI për të parashikuar lëvizjet e gjuetarëve të paligjshëm, duke i parandaluar përpara se të kryhet ndonjë dëmtim.
3) Një revolucion i inteligjencës artificiale në bujqësi
AI ka aftësinë të analizojë të dhëna të shumta dhe të larmishme dhe të ofrojë rezultate të personalizuara, madje edhe në pajisje të thjeshta si smartphone. Në shtetin Telangana të Indisë, një projekt pilot me 7,000 fermerë të specave djegës përdori AI për analiza tokësore, menaxhimin e plehrave dhe parashikimin e dëmtuesve. Në fund të projektit, fermerët kishin rritur prodhimin me 20%, kishin ulur përdorimin e pesticideve dhe plehrave dhe kishin dyfishuar të ardhurat neto.
4) Peizazhet zanore të detit
Një metodë e re dhe premtuese për monitorimin e shëndetit të shkëmbinjve koralorë është përmes dëgjimit të tyre. Hidrofonët e ndjeshëm nënujore kapin tingujt më të lehtë, ndërsa një sistem AI i quajtur SurfPerch analizon këto të dhëna për të gjurmuar lëvizjet e peshqve dhe specieve të tjera detare, duke krijuar një pamje të detajuar të shëndetit ekologjik të zonës.
Përmes projekteve si Project CETI, studiuesit po përdorin AI për të analizuar komunikimin mes balenave dhe specieve të tjera, duke ndihmuar në kuptimin më të mirë të këtyre ekosistemeve komplekse.
AI dhe konsumi i energjisë
AI ka një anë të errët: kërkon nivele të larta të energjisë. Por, teknologjitë më të mëdha si Google dhe Microsoft po investojnë në energji të rinovueshme për të reduktuar ndikimin. Gjithashtu, AI ka ndihmuar në optimizimin e konsumit të energjisë, siç është rasti i qendrave të të dhënave të Google, ku përdorimi i energjisë për ftohje u ul me 40%.
Pavarësisht sfidave, potenciali i AI për të ndihmuar planetin është i madh. /Katror.info
Përgatiti:
