Aktorja dhe modelja Cara Delevingne luan rolin e Sir Elton John në një video të re për këngën e tij “Step Into Christmas”.
Në këtë video, që paraqet një interpretim të ri prapa skenave të asaj të publikuar më shumë se 50 vite më parë, Delevingne, 32 vjeçe, vesh një kostum dhe syze identike me ato që mbante këngëtari dhe kantautori në versionin origjinal, shkruan The Guardian, përcjell Katror.info.
Kur u publikua fillimisht në nëntor të vitit 1973, “Step Into Christmas” arriti vendin e 24-të në top 40-shen e Mbretërisë së Bashkuar dhe kryesoi listën e këngëve të Krishtlindjeve të Billboard-it.
Delevingne, e cila është një mike e ngushtë e John-it, tha: “Elton ka qenë gjithmonë një idol për mua. Të them që muzika e tij ka pasur një ndikim thellësisht të fuqishëm tek unë është pak. Të më kërkonte të luaja atë në këtë rikrijim ishte një ëndërr që nuk e dija se kisha, derisa ndodhi. Sinqerisht, do të doja të pretendonja se isha Elton çdo ditë.
“Shpresoj që Elton të mund të ma kthejë nderin një ditë dhe të pranojë të luajë mua në filmin biografik për jetën time, i cili ende nuk është zhvilluar, shkruar, prezantuar apo financuar”
John tha: “E pashë Cara-n në Glastonbury verën e kaluar dhe folëm për sa shumë do të na pëlqente të punonim bashkë nëse do të dilte ideja e duhur. Ajo është shumë qesharake dhe është një kënaqësi të kalosh kohë me të; të dy kemi një humor vetë-ironik.
“Kur dikush sugjeroi idenë që ajo të më luante mua në një version të vitit 1973 të videos ‘Step Into Christmas’, mendova se ishte një mundësi e përkryer. Faleminderit zotit që Cara mendoi të njëjtën gjë, sepse doli fantastike.”
Dokumentari i John-it me titull “Elton John: Never Too Late” u publikua në Disney+ më 13 dhjetor. Muajin e kaluar, ylli publikoi këngën “Never Too Late”, të cilën e bashkë-shkroi me këngëtaren dhe fituesen e Grammy-t, Brandi Carlile. /Katror.info
Përgatiti:
