Ylli botëror i muzikës pop Dua Lipa, ka bashkuar talentin dhe përkushtimin për të ndihmuar të rinjët kosovarë përmes një iniciative unike artistike.
Në bashkëpunim me fondacionin ‘Soundwaves Art’, ajo ka krijuar një koleksion veprash arti të bazuara në valët zanore të hiteve të saj, të gjitha me nënshkrimin e saj personal.
Ky projekt, i cili synon të mbështesë Fondacionin ‘Sunny Hill’, është një mundësi për fansat dhe artdashësit kudo që të zotërojnë një pjesë të veçantë të historisë muzikore, duke kontribuar njëkohësisht për kauza që fuqizojnë rininë në art, muzikë dhe kulturë.
“Me këtë nismë, po vazhdojmë përkushtimin tonë për t’u dhënë të rinjve mundësi të reja për të shpalosur potencialin e tyre në muzikë, art dhe kulturë, ky projekt është një tjetër shembull se si arti mund të frymëzojë dhe të bëjë ndryshim.”u theksua në komunikatën për media nga Fondacioni Sunny Hill.
Fondacioni ‘Soundwaves Art’, i njohur për bashkëpunimet e tij me artistë të njohur si Peter Gabriel, Metallica, Billie Eilish, dhe The Killers, ka krijuar këtë koleksion të veçantë duke vizualizuar valët zanore të regjistrimeve të Dua Lipës. Vepra të tilla unike janë nënshkruar nga këngëtarja pak para performancës së saj në ‘Austin City Limits’ më 12 tetor 2024.
Të ardhurat nga shitja e këtyre veprave do të shkojnë drejtpërdrejt në Fondacionin ‘Sunny Hill’, organizatë kjo e themeluar nga familja Lipa në Prishtinë.
Fondacioni ‘Sunny Hill’, themeluar nga familja Lipa në Prishtinë, është bërë sinonim i ndryshimit pozitiv në komunitet. Me projekte që promovojnë edukimin, artin dhe vullnetarizmin, fondacioni ka fuqizuar shumë të rinj të talentuar.
Këtë vit, ‘Sunny Hill’ ka realizuar disa nisma të mëdha, përfshirë dërgimin e 11 të rinjve në kampin prestigjioz suedez ‘Musikmakarna’, ka mbështetur korin Siparantum në fitoren e tyre në Seul, si dhe ka ndarë 30 bursa për vajza të reja në fushat STEM.
Me këtë projekt të veçantë, ajo po tregon edhe një herë angazhimin e saj për t’iu dhënë të rinjve kosovarë mundësinë për të ndjekur ëndrrat e tyre.
Fansat që duan të mbështesin këtë kauzë dhe të sigurojnë një vepër unike me nënshkrimin e Dua Lipës mund të vizitojnë këtë link.
Me këtë blerje, ata kontribuojnë në një iniciativë që sjell shpresë dhe krijon mundësi të reja për të rinjtë e talentuar të Kosovës. /Katror.info
Përgatiti:
