NASA po zhvillon robotë të vegjël notues që mund të eksplorojnë oqeanet nën sipërfaqen e ngrirë të hënave si Europa, një nga satelitët e Jupiterit, duke kërkuar shenja të jetës aliene. Europa mendohet të ketë më shumë ujë të lëngshëm sesa të gjithë oqeanet e Tokës së bashku. Aktiviteti gjeologjik i saj mund të krijojë kushte të favorshme për jetën duke ngrohur oqeanet nën akull dhe duke ofruar lëndë ushqyese.
Plani i NASA-s përfshin përdorimin e një sonde termale me energji bërthamore për të shkrirë shtresën e akullit, rreth 10 milje të trashë dhe për të krijuar një tunel drejt oqeanit të lëngshëm. Më pas, robotët notues do të zhyten për të eksploruar dhe marrë të dhëna mbi temperaturën, përbërjen kimike dhe presionin.
Dr.Ethan Schaler, studiues kryesor në Jet Propulsion Laboratory të NASA-s, tha: “Jeta në Tokë kërkon ujë dhe ka prova të forta që disa hëna të ngrira kanë oqeane të mëdha nën sipërfaqet e tyre të ngrira.” Prototipat e robotëve, të ndërtuar me plastikë të printuar në 3D, kanë treguar rezultate premtuese gjatë testimeve në Kaliforni, transmeton Top Albania Radio.
Mundesh me e lexu edhe…
Aktualisht, këta robotë janë 42 cm të gjatë dhe peshojnë 2.3 kg, por inxhinierët synojnë t’i zvogëlojnë deri në madhësinë e një telefoni celular.
Të pajisur me sensorë për të matur aciditetin, presionin dhe përbërjen kimike, robotët do të komunikojnë përmes sinjaleve me sondën kryesore, e cila do të transmetojë të dhënat në Tokë.
NASA po pret të dhëna nga misionet Europa Clipper dhe JUICE, që do të arrijnë në hënën e Jupiterit në vitet 2030, për të përcaktuar nëse oqeanet e saj kanë kushte të përshtatshme për jetë. Nëse rezultatet janë pozitive, robotët notues mund të marrin miratimin për një mision eksplorues.
Rikujtojmë se Agjencia hapësinore e Shteteve të Bashkuara (NASA) tha se sonda e saj diellore, Parker, është “e sigurt” dhe po operon normalisht në afrimin më të afërt me Diellin të bërë nga ndonjë objekt i ndërtuar nga njeriu.
Anija kozmike kaloi vetëm 6.1 milionë kilometra nga sipërfaqja diellore më 24 dhjetor, duke fluturuar në atmosferën e jashtme të Diellit, të quajtur korona, në misionin që synon të ndihmojë shkencëtarët që të mësojnë më shumë për yllin më të afërt me Tokën. Agjencia tha se ekipi i operacioneve në Laboratorin për Fizikë të Aplikuar të Johns Hopkins ka pranuar një sinjal nga sonda pak para mesnatës. /Katror.info
Përgatiti:
