Universal Music Group ka anuluar të gjitha eventet e saj të lidhura me Grammy-t, përfshirë shfaqjen e artistëve të së shtunës dhe festën pas Grammy-t të së dielës, ngjarje që zhvillohen si pjesë e spektaklit të madh.
Kompania do të përdorë fondet për të mbështetur ndihmën ndaj zjarreve në Los Angeles, shkruan Variety, përcjell Katror.info.
“Sot kemi anuluar të gjitha eventet tona të lidhura me Grammy-t, përfshirë Shfaqjen e Artistëve dhe Festën pas Grammy-t, dhe do të ridrejtojmë burimet që do të ishin përdorur për këto evente për të ndihmuar të prekurit nga zjarret, mirënjohja jonë më e thellë shkon për ekipet e shpëtimit dhe personelin që vazhdojnë të veprojnë me heroizëm” thuhet në një deklaratë të kompanisë.
“Los Angeles është shtëpia e kaq shumë prej nesh, jemi të angazhuar për të ndihmuar dhe mbështetur komunitetin muzikor, artistët tanë, ekipet tona dhe njerëzit e Los Angeles për të kaluar këtë episod të tmerrshëm” thuhet tutje në deklaratë.
Vitin e kaluar, ‘Universal’ kishte anuluar shfaqjen e artistëve si rezultat i reduktimit të stafit në kompani, megjithatë festa pas Grammy-t u mbajt, pavarësisht reshjeve të mëdha të shiut në Los Angeles atë ditë.
Zjarret, që kanë shkatërruar disa lagje në zonën e gjerë të Los Angeles-it për pesë ditët e fundit, kanë ndikuar komunitetet përfshirë Altadena, Sylmar, Granada Hills, Studio City dhe Runyon Canyon.
Në fillim të kësaj jave, kishte diskutime në industri për mundësinë që Akademia e Regjistrimeve të shtynte Grammy-t, të planifikuara për 2 shkurt.
Të hënën në mëngjes, Harvey Mason Jr drejtor ekzekutiv i ‘Recording Academy’, i Akademisë së Regjistrimeve dhe MusiCares, dhe Tammy Hurt, kryetarja e bordit të akademisë, konfirmuan se ceremonia e ndarjes së çmimeve Grammy do të zhvillohet më 2 shkurt, ashtu siç ishte planifikuar.
“Këtë vit, megjithatë, shfaqja do të ketë një qëllim të rinovuar: mbledhjen e fondeve shtesë për të mbështetur iniciativën për ndihmë ndaj zjarreve dhe nderimin e guximit dhe të përkushtimit të ekipeve të shpëtimit që rrezikojnë jetët e tyre për të mbrojtur tonat,” u tha në deklaratë. /Katror.info
Përgatiti:
