Jennie, ylli i grupit ikonë të K-pop-it, Blackpink, është gati të shkëlqejë si artiste solo me publikimin e shumëpritur të albumit të saj debutues, ‘Ruby’.
I planifikuar për t’u publikuar më 7 mars, albumi do të shpërndahet nga ekipi i saj i sapo themeluar, Odd Atelier, në bashkëpunim me Columbia Records. Ky projekt me 15 këngë përfshin bashkëpunime mbresëlënëse me artistë të njohur si Childish Gambino, Dua Lipa, Doechii, Dominic Fike, FKJ dhe Kali Uchis.
Kënga ‘Mantra’, e publikuar në tetor, do të përfshihet në album.
Kjo këngë ka tërhequr tashmë vëmendje të madhe, duke kryesuar tabelën Top Songs të iTunes në 47 vende, përfshirë SHBA-në, Brazilin, Singaporin dhe Meksikën.
Gjithashtu, bëri histori si kënga e parë nga një artiste grua solo e K-pop-it që arriti vendin e parë në tabelën Top Songs të iTunes në SHBA dhe qëndroi për dy javë radhazi në tabelën Billboard Hot 100, shkruan Variety, transmeton Katror.info.
Në një trailer 33-sekondësh të albumit, të publikuar të mërkurën, Jennie, me flokët e saj të kuqe, ofron një pasqyrë të estetikës dhe temave të këngëve të albumit, duke përfshirë fraza si “U rrita në errësirë” dhe “Paratë nuk mund të blejnë miq të vërtetë.”
Anëtarja tjetër e Blackpink, Lisa, po përgatitet të zbulojë albumin e saj të parë solo, “Alter Ego,” më 28 shkurt. Rosé nisi valën e albumeve solo në fund të vitit të kaluar me “Rosie,” projektin e saj debutues, i cili u publikua më 6 dhjetor.
Jennie, e cila nënshkroi si artiste solo me Columbia Records në bashkëpunim me shtëpinë e saj muzikore Odd Atelier në shtator të vitit të kaluar, debutoi për herë të parë në vitin 2016 si anëtare e Blackpink, grupi femëror korean më i suksesshëm në tabelat e Billboard dhe i vetmi artist nga Koreja që ka kryesuar skenën e Coachella. Në vitin 2023, ajo bashkëpunoi me The Weeknd dhe Lily-Rose Depp në këngën “One of the Girls” dhe u shfaq me ta në serialin kontrovers të HBO-së, “The Idol.”
Artistja u lind në Korenë e Jugut, por në moshën 10-vjeçare u transferua për të studiuar në Auckland, Zelandën e Re, ku qëndroi për pesë vite.
Pas rikthimit në Kore, ajo iu bashkua akademisë së talenteve të YG. Blackpink u formua në vitin 2016 dhe ka arritur të bëhet grupi i parë muzikor dhe grupi i parë femëror korean që ka pesë videoklipe muzikore me mbi 1 miliard shikime secili në YouTube, si dhe grupi femëror më i ndjekur në Spotify./Katror.info
Përgatiti:
