Kosova shënoi një hap të madh ekonomik më 22 janar të këtij viti, kur nënshkroi një marrëveshje me Shoqatën Evropiane të Tregtisë së Lirë (EFTA), pas bisedimeve që zgjatën më pak se tre vjet.
Nëse një prodhues vendës kosovar është detyruar të paguajë një tarifë shtesë doganore prej 10 për qind për t’i eksportuar mallrat e veta në një vend me mërgatë të madhe, si Zvicra, nga tani ai, lëre më që nuk do të paguajë çmim shtesë, por nuk do të paguajë fare tarifë doganore. Këtë e ka mundësuar një marrëveshje e saponënshkruar ndërmjet Kosovës dhe Shoqatës Evropiane të Tregtisë së Lirë (EFTA), ku, përveç Zvicrës, bën pjesë edhe Islanda, Lihtenshtajni dhe Norvegjia, raporton Radio Evropa e Lirë.
Heqja e tarifave është një nga lehtësitë që do t’i gëzojnë kompanitë kosovare që eksportojnë apo duan të eksportojnë në vendet anëtare të EFTA-s, me të cilën Kosova e nënshkroi më 22 janar një Marrëveshje për Tregti të Lirë, më pak se tri vjet pasi i hapi bisedimet me këtë organizatë.
Mundesh me e lexu edhe…
Marrëveshja ofron shumë mundësi, përfshirë ato për importimin dhe eksportimin e mallrave. Konsumatorët dhe kompanitë mund të gëzojnë çmime më të lira, ndërsa kompanitë vendëse mund t’i shesin produktet e tyre më me lehtësi në tregjet e huaja.
Ndërkaq Kryeministri i Kosovës, Albin Kurti, në një intervistë për Euronews Albania, foli për arritjet dhe sfidat e Kosovës të shpalosura në Davos Gjatë një sërë takimesh diplomatike dhe politike, Kurti theksoi avancimin demokratik dhe rritjen ekonomike të Kosovës, duke përfshirë tejkalimin e vlerës prej 1 miliardë eurosh në eksportet vjetore, transmeton Katror.info.
”Ne kemi interes të përfshijmë shërbimet në tregti, pasi eksportojmë shumë shërbime nga sektori i teknologjisë së informacionit dhe komunikimit. Padyshim që tashmë ndërmarrësit tanë kanë fituar një treg të ri dhe kjo do të paraqesë një mundësi shtesë për të rritur prodhimtarinë në Kosovë dhe për të shtuar eksportin e Kosovës, i cili për herë të parë ka kaluar vlerën prej 1 miliardë eurosh në vitin 2024”, u shpreh Kurti.
Ai gjithashtu foli edhe për formimin dhe funksionalizimin e Shtëpisë së Kosovës, të cilën e quajti një hap të rëndësishëm që reflekton prezencën dhe avancimin e Kosovës në arenën ndërkombëtare.
”Është hera e katërt që vij në Forumin Ekonomik Botëror, por kësaj radhe ishte e veçantë sepse, përveç takimeve, kemi formuar dhe funksionalizuar Shtëpinë e Kosovës në Davos. Në vitet e mëhershme shkonim si mysafirë te shtëpitë e të tjerëve, ndërkaq kësaj radhe na vijnë mysafirë në Shtëpinë e Kosovës. Nga ana tjetër, ishim dakorduar që nënshkrimin e marrëveshjes me EFTA-n – pra Islandën, Norvegjinë, Zvicrën dhe Lihtenshtejnin – ta bëjmë pikërisht gjatë Forumit Ekonomik Botëror këtu në Davos”, tha ai.
Kurti ka shpalosur sfidat e sigurisë së vendit të shkaktuara nga Serbia, duke theksuar se Kosova ka dalë fitimtare në përballje të rregullta. Ai gjithashtu ka nënvizuar rëndësinë e bashkëpunimit me ndërmarrësit dhe liderët ndërkombëtarë për të hapur mundësi të reja ekonomike. /Katror.info
Përgatiti:
