Shefja e Misionit Vëzhgues të Zgjedhjeve nga BE, Nathalie Loiseau, cilësoi zgjedhjet e 9 shkurtit në Kosovë si të qeta dhe përgëzoi votuesit për pjesëmarrjen duke theksuar rëndësinë e këtij procesi për demokracinë në vend, raporton Katror.info.
“Në përgjithësi, dita e zgjedhjeve ishte e qetë dhe votuesit mundën të hedhin votën e tyre në kushte të mira, falë përkushtimit të stafit të qendrave të votimit. Këto janë shenja të qarta se populli i Kosovës është i përkushtuar ndaj demokracisë”, tha ajo.
Loiseau shprehu shqetësimin e saj lidhur me përdorimin e gjuhës nxitëse dhe sulmeve verbale gjatë fushatës, si dhe për bllokimin e Komisionit të Pavarur për Media.
Ajo shprehu mirënjohje ndaj të gjitha palëve për angazhimin e tyre në procesin zgjedhor.
Shefja e Misionit Vëzhgues të Zgjedhjeve nga BE, Nathalie Loiseau theksoi se ndonëse vëzhguesit nga BE e vlerësuan përgjithësisht ditën e votimit si pozitive, sfidat në zbatimin e procedurave u bënë më të dukshme gjatë këtij procesi.
Ajo theksoi se Komisioni Qendror i Zgjedhjeve u përball me vështirësi, kryesisht në fushat e trajnimit dhe prokurimit, çka mund të ketë shkaktuar vonesa të konsiderueshme.
Loiseau nënvizoi se është e domosdoshme që të sigurohet transparencë e plotë për të kuptuar qartë se çfarë ka ndodhur dhe arsyet që qëndrojnë pas këtyre vonesave.
“Ndërsa vëzhguesit tanë e vlerësuan përgjithësisht pozitivisht ditën e votimit, sfidat në zbatimin e procedurave u bënë më të dukshme në këtë fazë. Vëzhguam se Komisioni Qendror i Zgjedhjeve hasi vështirësi, veçanërisht në aspektet e trajnimit dhe prokurimit, gjë që mund të ketë shkaktuar vonesa të konsiderueshme. Transparenca e plotë është thelbësore për të kuptuar çfarë po ndodh dhe pse”, theksoi ajo.
Misioni e ka cilësuar ndërhyrje në proces zgjedhor kritikën që emisari amerikan për misione të posaçme, Richard Grenell, ia bëri kryeministrit Albin Kurti gjatë fushatës zgjedhore.
Në një konferencë për media, të martën, ku është dhënë deklarata preliminare për mbarëvajtjen e zgjedhjeve, shefja e misionit Natalie Loiseau ka thënë se deklarata e Grenellit ishte jodiplomatike.
“Gjatë fushatës ne kemi qenë dëshmitarë të ndërhyrjeve nga emisari special amerikan, Richard Grenell në media sociale, që kritikoi kryeministrin Albin Kurit. Mund të përshkruhet si mjet shumë jodiplomatik”, ka thënë ajo.
Grenell në një postim në rrjetet sociale pati shkruar se “e gjithë bashkësia ndërkombëtare është kundër Kurtit” dhe se “marrëdhëniet SHBA-Kosovë kurrë nuk kanë qenë në nivel më të ulët”.
Ndonëse në përgjithësi procesi zgjedhor është vlerësuar se demonstroi qëndrueshmëri dhe përkushtim ndaj parimeve demokratike, janë dhënë kritika për gjuhën e përdorur në fushatë zgjedhore, duke nënvizuar se gratë kandidate u janë nënshtruar sulmeve verbale seksiste dhe se patën më pak mbulueshmëri mediatike.
Është përmendur numri i madh i rasteve të paraqitura në Panelin Zgjedhor për Ankesa dhe Parashtresa, që rezultuan me shqiptim të gjobave të larta për shkelje të kodit të mirësjelljes.
Loiseau ka thënë se fushata është karakterizuar me gjuhë të ashpër të partive politike, e sidomos atë të përdorur nga Lëvizja Vetëvendosje.
“Ne kemi vërejtur përdorimin e gjuhës nxitëse dhe sulmet verbale për kundërshtarët në mitingje dhe debate televizive. Kjo ka reflektuar edhe në mediat sociale. Ne kemi parë me brengosje gjuhën negative nga partia në pushtet ndaj medias dhe gjyqësorit. Bojkotimi i mediave specifike dhe debateve ka ulur mundësinë që votuesit të bëjnë një zgjedhje të mirinformuar”, ka thënë ajo.
Shefja e misionit ka thënë se pati ndërhyrje edhe nga Beogradi e presion nga Lista Serbe mbi votuesit serbë.
“U raportua për presion nga Lista Serbe mbi votuesit dhe kishte ndërhyrje të përsëritur nga Serbia”, është shprehur ajo.
Këtë e ka konfirmuar edhe shefja e delegacionit të Parlamenti Evropian, Marta Temido, tek ka thënë se ende mungon pluralizmi politik mes komunitetit serb në Kosovë.
“Vëzhgimi ynë do të vazhdojë deri në përfundimin e të gjithë procesit zgjedhor, përfshirë trajtimin e çdo ankese të mundshme. Për momentin, 18 vëzhgues afatgjatë dhe 36 vëzhgues afatshkurtër nga misioni ynë janë ende të shpërndarë në të gjithë Kosovën. Për më tepër, ekipi ynë qendror i analistëve mbetet i angazhuar në vlerësimin e procesit. Ky mision u dislokua me ftesë të Presidentes së Kosovës dhe ndjek të njëjtën metodologji si të gjitha misionet ndërkombëtare të vëzhgimit të zgjedhjeve. Ne kemi dërguar mbi 100 vëzhgues nga të gjitha 27 shtetet anëtare të BE-së, si dhe nga Kanadaja, Norvegjia dhe Zvicra”, tha ajo.
Loiseau nënvizoi se misioni i vëzhgimit, i ftuar nga Presidentja e Kosovës, ka funksionuar në mënyrë të pavarur dhe të paanshme, dhe do të vazhdojë vëzhgimin deri në përfundimin e procesit zgjedhor.
Në fund, ajo u shpreh e kënaqur që procesi zgjedhor, në përgjithësi, dëshmoi stabilitet dhe një angazhim të fuqishëm ndaj parimeve demokratike, duke vlerësuar institucionet e Kosovës si funksionale dhe të pavarura, me një perspektivë të qëndrueshme demokratike. /Katror.info
Përgatiti:
