Grupi i ri i muzikës alternative ‘Hawolf’, me bazë në Prishtinë, ka publikuar këngën më të re, ‘Bukë e Kryp’.
Sot, do të hedhim dritë mbi grupin ‘Hawolf’, i njohur për tingujt e tij energjikë dhe unikë në skenën alternative.
Së fundmi, ata kanë publikuar këngën ‘Bukë e Kryp’, një krijim që pasqyron ndjenjat e atdhedashurisë dhe kërkimin për rikthim në vlerat e kaluara.
Ky projekt i ri e konsolidon më tej pozitat e grupit në skenën muzikore kosovare dhe më gjerë.
Mundesh me e lexu edhe…
‘Hawolf’ është një grup muzikor i bazuar në Prishtinë, i njohur për tingujt e tij alternativë dhe për kombinimin e pasionit dhe përvojës muzikore të katër vëllezërve Havolli. Me mbi 20 vjet përvojë, ata disponojnë të gjitha elementet e nevojshme për një grup muzikor, përfshirë prodhimin dhe aftësinë për të promovuar profesionalisht punën e tyre.
Grupi përbëhet nga Granit Havolli në vokal dhe kitarë, Yll Havolli në kitarë kryesore, Ylber Havolli në kitarë bas dhe Lum Havolli në bateri, duke sjellë një energji të veçantë në çdo performancë.
Nostalgjia dhe kërkimi i paqes në ‘Bukë e Kryp’
Në momentet e para kur kënga nis, ajo e mbush gjithçka me një thirrje të fuqishme, që të zgjatë dhe të tërheqë në një botë të brendshme të pasigurisë dhe kërkimit. Kjo ndjenjë është e theksuar edhe në videoklip, ku një person zgjohet nga gjumi, duke u ndjerë njëlloj si ai që e ka thirrur kënga, kurse jashtë, dikush tre të tjerë po kompozojnë diçka.
Si dyshja e cila vazhdon të këndojë, fjalët e tyre arrijnë deri te personi që është duke kryer punët shtëpiake, një person që jeton mes dy botëve të tashmes dhe të kaluaren. Kur ata këndojnë “A kem deviju’?” dhe “Spo muj’ me u msu’”, krijohet një pasqyrë e përpjekjes për të rikthyer një gjendje të humbur, një kujtim të dikurshëm.
Kënga vazhdon me një ndjenjë nostalgjie, ku fjalët si “Kujtimet më mbajnë, mall m’ka marrë, Buk’ kryp, Zemër gjan’” përshkruajnë tërheqjen pas një të shkuare të pamundur të rikthehet.
Në një moment, personazhi nuk qëndron më vetëm në punët e përditshme, por largohet për të kërkuar diçka më të madhe, diçka që mund ta rikthejë në një paqe të brendshme. Kjo kërkesë për diçka më shumë shfaqet në tekstin “A vjen një ditë? / Pres pres, çdo ditë”, ku ai shpreson për një ndryshim.
Ai niset në kërkim, kërkon në dy apo tri vende, gjithnjë në kërkim të asaj që mund të rikthejë ndjenjat e humbura dhe paqen. Teksti “Dielli kur m’bon dritë, kujtimet më mbajnë” shpreh një ndjenjë të thellë të mbërthyerjes nga e kaluara.
Pasi kërkon për një kohë, ai gjen atë që kërkonte një ‘plis të bardhë’ të fshehur në tokë. Ky moment simbolizon një gjetje të humbur dhe një përballje me të kaluarën, ndërsa ritmi i këngës bëhet më i fuqishëm dhe melodik, duke ndjekur ndryshimet në shpirtin e personazhit.
Pas gjetjes së “plisit të bardhë”, gjithçka bie në një gjendje qetësie, ku personazhi gjen atë që ka kërkuar, dhe muzika përfundon me një tingull të qetë, duke pasqyruar përfundimin e kërkimit të tij dhe rikthimin në një gjendje paqeje.
Kënga ‘Buke e Kryp’ e grupit Hawolf ka një dimension të thellë atdhedashurie, ku personazhi i këngës shpreh një ndjenjë të humbjes dhe një kërkim për të rikthyer një lidhje të dikurshme me atdheun dhe me vlerat e tij.
Në tekst, përmendet lufta dhe sakrificat e kaluara, ku fraza ‘Bashkë kemi knu’ / T’keqen kem’ luftu’ pasqyron angazhimin kolektiv dhe përpjekjen për të ndërtuar një të ardhme më të mirë.
Teksti i këngës shpreh një dëshirë për të rikthyer ditët e kaluara, kur uniteti dhe puna e përbashkët ishin motorët kryesorë të ndryshimit.
Përsëritja e pyetjes “A vjen një ditë?” dhe fjalët “Kujtimet më mbajnë / Malli m’ka marrë” nënvizojnë një kërkim të vazhdueshëm për rikthimin e asaj kohe kur atdhedashuria dhe solidariteti kishin një kuptim më të fuqishëm.
Kënga ‘Bukë e Kryp’ përdor një simbol të kulturës shqiptare, ku shprehja nënkupton mikpritjen dhe ofrimin e asaj që kemi, pavarësisht mundësive. Ajo pasqyron një ndjenjë nostalgjie dhe dëshirë për rikthimin në vlerat që formojnë identitetin kombëtar, duke theksuar lidhjen e fortë dhe unitetin për atdheun. /Katror.info
Përgatiti:
