Kosova ka shënuar një fitore dramatike ndaj Ukrainës në kualifikimet për Kampionatin Evropian të Hendbollit “Euro 2026”. Me golat e Egzon Gjukës dhe kapitenit Valon Dedaj në minutat e fundit, “Dardanët” siguruan një triumf të madh me rezultat 31:30 në ndeshjen e zhvilluar të enjten mbrëma në Pallatin e Rinisë dhe Sportit në Prishtinë, shkruan Katror.info.
Kosova e dominoi pjesën e parë duke e mbyllur atë me rezultat 16:12 dhe ruajti epërsinë për pjesën më të madhe të lojës. Megjithëse Ukraina arriti të rikthehet, përqendrimi i lartë i hendbollistëve kosovarë në momentet vendimtare bëri diferencën, duke i dhënë Kosovës dy pikë të rëndësishme në Grupin 6.
Fitorja e mban gjallë shpresën e Kosovës për një kualifikim historik në Evropian. Ndeshja e radhës do të luhet të dielën në Klaipeda të Lituanisë, ku Kosova dhe Ukraina do të përballen sërish. Për shkak të pushtimit rus, Ukraina i zhvillon ndeshjet si vendëse në shtete të tjera.
Nga Grupi 6, dy ekipet më të mira kualifikohen drejtpërdrejt në Evropian, ndërsa katër përfaqësueset më të mira nga vendi i tretë, prej tetë grupeve kualifikuese, gjithashtu sigurojnë një vend në turneun që do të mbahet nga 15 janari deri më 1 shkurt 2026 në Danimarkë, Suedi dhe Norvegji.
Kosova synon kualifikimin përmes pozitës së tretë, duke mbajtur shpresat e gjalla për një sukses historik në arenën evropiane të hendbollit./Katror.info
Përgatiti:
