Sikur shumë mërgimtarë, edhe për Kened Baftiajn nuk ishte aspak e lehtë ndarja nga familja, shoqëria dhe shkolla ku ishte një nxënës shembullor. Ai la prapa të gjitha në vendlindjen e tij, në komunën e Therandës dhe mori rrugën drejt perëndimit.
Austria ishte ndalesa e parë e Kenedit, përkatësisht në Wolfsberg ku dhe gjeti punë si punëtor krahu. Megjithatë, kjo nuk zgjati për shumë kohë, meqë ai kishte dëshirë të punonte si kamerier.
Aq vullnet të madh kishte, sa që për disa muaj kishte punuar falas në një restorant vetëm për ta mësuar zanatin, që më vonë i shërbeu shumë.
Mundesh me e lexu edhe…
“Isha i detyruar të punoja punë të ndryshme, por puna e krahut nuk më bënte të lumtur. Kafshatën e gojës e kisha siguruar, por unë doja të arrija më lartë. Po punoja në një fabrikë të skive, por sërish nuk isha i kënaqur, doja që të mësoja zanatin e kamarierit. Punova për një kohë të gjatë falas në një restorant nga ora 18:00 deri në 24:00. Punën në fabrikë e lash dhe për mua nisi një kapitull tjetër. Punova si kamerier në restorante të ndryshme dhe në zona të skive në tërë Austrinë. Nuk gjeja qetësinë shpirtërore, andaj edhe hapa lokalin tim në Graz”, tregoi ai për Albinfo Austria.
Sot pronar i tri bizneseve
Pasi hapi lokalin e tij në Graz, Kenedi nuk u ndal. Ai pas vitit 2008 arriti të jetë pronar i tri bizneseve; një restoranti në Graz dhe i dy firmave të tjera.
“Ëndrra ime u realizua dhe deri më tash çdo gjë po shkon mbarë. Tani jam pronar i një restoranti në zonën këmbësore të Graz-it dhe i disa pasurive të paluajtshme (Eigentümer). Dy firma të tjera janë aktive, njëra për: Zhvillim dhe ndërmjetësim të pasurive të paluajtshme (Immobilienentwicklung und Vermittlung) dhe tjetra për: Menaxhim, blerje dhe shitje të pasurive të paluajtshme. (Hausverwaltung, Kaufen und Verkaufen von Immobilien). Landi Steiermark është një ndër partnerët kryesorë në bizneset e mia dhe unë u jam shumë mirënjohës për besimin që kanë treguar tash dhjetë vite për mua”, ka thënë Kenedi për Albinfo Austria.
Ai shprehet se të bësh biznes në Austri nuk është e vështirë, deri sa t`u përmbahesh rregullave dhe bën punë cilësore./Katror.info
Përgatiti:
