Hurmat janë nji prej ushqimeve e frutave që e veçojnë kuzhinën e Lindjes t’Mesme dhe kanë arritë me gjetë përdorim n’shumë prej recetave e tryezave edhe t’kulturave t’tjera, përfshirë edhe atë shqiptare. E përdorim jashtëzakonisht t’madh ky frut gjenë përgjatë muajit t’Ramazanit – muaj ky që për shumëkand asht i paimagjinueshëm me u nisë e me u kry pa hurma.
Me që ëahtë ramazan po e shfrytëzojmë rastin me shkru e me t’informu për nji prej ushqimeve ma simbolike; ushqim ky që i shoqnon jo vetëm ata që agjërojnë, por edhe ata që thjeshtë i gëzohen shyhretit që ky muj’ sjellë. Bahet fjalë për hurmat. Madje, t’i kemi listu edhe benefitet shëndetësore që konsumimi i këtij fruti ka.
1. Hurmat janë fryte që dalin prej pallmës t’hurmës, pallmë kjo që pos n’vendet e Lindjes t’Mesme, gjindet e rritet edhe n’vendet e Mesdheut, Azisa, ShBA-së dhe Meksikës
Nëse nuk ke pa ndonjiherë pallmë hurmeje, atëherë fotoja e masipërme e ilustron ma s’miri se qysh duken dhe frytet e hurmës; n’tufa t’mëdhaja t’cilat rrijnë t’vjerruna n’pallma. E asht mirë me e ditë që për me u konsideru t’ngarnshme, hurmat duhet me u pjekë, me e humbë shumicën e lagështisë që kanë, me u zbutë, me u rudhë e me marrë ngjyrën e kafët.
2. Hurmat konsiderohen si nji prej frutave ma t’ushqyeshëm dhe t’shnetshëm për konsum dhe me t’drejtë
Plot nutricistë, dietologë e rekomandojnë konsumimin e 2-3 hurmave n’ditë pikërisht për shkak t’vlerave t’nalta ushqyese që ato kanë. Kështu,hurmat kanë veti antioksiduese e që ndikojnë pozitivisht n’menaxhimin e rrezikut t’sëmundjeve kronike. Ato poashtu përmbajnë fibra dhe rrjedhimisht t’mbajnë ma t’ngopun se shumë ushqime t’tjera. Hurmat poashtu janë burim i mineraleve duke përfshirë fosforin, kaliumin, kalciumin dhe magnezin, por edhe vitaminës K – elemente këto që i forcojnë eshnat.
Mundesh me e lexu edhe…
3. Studime t’ndryshme tregojnë se hurmat e reduktojnë rrezikun për shfaqjen e kancerit t’zorrës t’trashë
Nji studim i vitit 2015 zbuloi se konsumimi i hurmave mundet me e zvogëlu rrezikun prej kancerit n’zorrën e trashë falë përmbajtjes t’fibrave. I njejëti studim poashtu ka vu n’pah që përfshirja e hurmave n’dietën e grave shtatëzana, e veçanarisht atyre që janë n’prag t’lindjes mundet me e nxitë zgjerimin e qafës t’mitrës, gja që ndihmon/mundëson/lehtëson lindjen natyrale, por edhe e zvogëlon kohëzgjatjen e lindjes.
4. Hurmat janë nji zavendësues natyral i sheqernave
Konsumimi i hurmave asht nji mënyrë e mirë dhe e shnetshme me e ambëlsu vehtën pa pasë nevojë me hjekë dorë prej t’amblit e as prej shijes, meqë hurmat me konsistencën dhe ambëlsinë që knë arrijnë me ta largu zhigun e ambëlsinave palidhje. Plus, s’dojnë fort mund; mundesh me i hangër qashtu qysh janë – pos me ua largu thelbin, me i mbushë me ndonji frut arror ose ndonji fill (hurma me gjalpë kikiriku), apo edhe me i vendosë n’smoothie t’ndryshme për ekstra shije – smoothie me avokado dhe hurma, smoothie me hurma dhe dredhëza, ose smoothie me hurma dhe banane janë veç disa shembuj se qysh mundesh me i përfshi hurmat n’pijet e tua t’shnetshme.
5. Me hangër shumë hurma mundesh edhe me u trashë
Edhepse super-frut dhe me shumë benefite për shnetën tonë, hurmat janë bajagi ushqim që po nuk i konsumove n’mënyrë t’moderume munden me t’trashë meqë përmbajnë bukur shumë kalori dhe karbohidrate. Kështu, 3 hurma i kanë diku rreth 200 kalori, 54 gr karbohidrate me dike rreth 5 gr fibra dhe 1 gr proteinë. Andaj, nëse e ke qëllim humbjen e peshës, atëherë asht mirë me e marrë n’konsideratë mos me hangër edhe shumë hurma, ose nëse fort t’i ka’ana – me dal/ushtru n’mënyrë që me djegë ma shumë kalori.
Si do që t’jetë, me ose pa faktet e lartpërmenduna, hurmave gjith’qysh secili prej nesh ua gjenë vendin, qoftë n’dietat e n’recetat tona t’smoothie-ve t’mëngjesit, qoftë n’ato t’syfyrit apo edhe n’iftar. Ajo çka asht ma se e ashiqarshme asht fakti që njilloj sikurse mandarinat e ruska sallata që janë simbol i vitit t’ri, vezët simbol i pashkëve, bakllava simbol i bajramit e t’tjerë, nj’ashtu janë edhe hurmat për muajin e Ramazanit.
Ty që agjëron, por edhe ty që s’agjëron, t’baftë mirë secila hurmë që e kafshon! /katror.info/
Ky artikull është përgatit’ nga Kaltrina Zhushi. Për me pa receta të mira dhe te shëndetshme, mundeni me e vizitu blogun e saj në Instagram @gurmaneria
Përgatiti:
