Për shumë kënd vendi i punës qëndron veç në korniza profesionale, ndërkaq për Drita Xhylanin ajo u bë drita në fund të tunelit. Epoka e diskriminimit për shkak të nevojave të veçanta tanimë ka mbaruar. Rrugëtimi i ri jetësor iu bë shpresë për çdo hallkë të jetës.
37 vjeçarja tash e dy muaj i është bashkuar fabrikës së letrës “Freesia”, iniciativë e Fondacionit Golden Eagle. E para në Ballkan për përfshirje të punëtorëve me aftësi të kufizuara, tanimë fabrika numron 10 punëtorë. Madje aty respektohet edhe kuota gjinore, për të cilën ka raportuar Katror Media në edicionin e 11-të të “Aktivizmit Qytetar”.
“Unë kam lyp punë edhe në tjera vende por nuk më kanë ofruar punë, për shkak të gjendjes time ndoshta, nuk po e di sigurt. Ama këtu menjëherë më kanë pranuar, me të parën intervistë“, thotë punëtorja Drita Xhylani.
Mundesh me e lexu edhe…
Kur pyetet nëse ka në Kosovë diskriminim për këtë kategori të shoqërisë, ajo e pohon këtë fenomen.
“Jemi shumë të diskriminuar nga të gjitha institucionet. Unë kam aplikuar edhe në konkurse shtetërore, as aty s’më kanë pranuar”, thotë Xhylani krahas aplikimeve në institucione private.
Diferencën e bëri fondacioni “Golden Eagle”, mirëpo veçantia më e madhe e kësaj iniciative qëndron në mënyrën se si ka lindur.
“Iniciativa e hapjes së kësaj fabrike me persona me aftësi të kufizuara ka nisur duke u inspiruar ndoshta me mua vetë. Jam qe 7 vite pjesë e kompanisë “Frutex”, prandaj ata duke i parë aftësitë e mia, pronari e mori vendimin që me nis një fabrikë ku punësohen vetëm persona me aftësi të kufizuara ku udhëheqësi jam unë”, ka thënë drejtori Endrit Rexhaj.
Endriti duke qenë model si punëtor, u bë frymëzimi i nisjes së kësaj historie. Ai tashmë nuk është veç udhëheqës i një fabrike. Por edhe shpresë për personat tjerë me aftësi të kufizuara, të cilëve më së miri hallet ia kupton ai.
“Më bën të ndjehem nuk e di qysh ma mirë se kur ta dish çfarë fabrike je duke udhëheq edhe çfarë kategorie të personave je duke çuar përpara, ti je zani i tyre që je duke i çuar përpara sa ma shumë me ec, me pasë kurajo e vetëbesim, përkrahje ma të madhe, besoj ka me qenë shumë ma mirë”, është shprehur Rexhaj.
Procesi i punës nis me krijimin e frytezave për të kaluar te mbështellja e letrës. Në fund merret forma e letrave nëpërmjet prerjes dhe në fund gjithça është gati për paketim.
Në këtë ambient pune, ajo që e ndjen veten të përmbushur është edhe Xhevrie Borovci. Ajo thotë se pikërisht kjo fabrikë ia ka falur atë që s’e gjejnë në vende tjera.
“Kam punuar (më herët) edhe si kujdestare e fëmijëve edhe mirëmbajtëse, edhe kam punuar si rrobaqepëse dy vite e gjysmë te një dizajnere”, tha Borovci teksa edhe bëri dallimet për kushtet e punës. “Dallimi është shumë i madh, nuk kam stres, kurrëfar stresi, nuk na ngut kërkush, këtu jemi të sigurt, e di që jam e sigurt”.
Një nga vlerat e kësaj fabrike është që punësojnë persona me Aftësi të kufizuara, të cilët lajmërohen me vetiniciativë. Mirëpo një ndihmesë të madhe në këtë drejtim ka kryer edhe organizata “Handikos”, përfaqësuesi i së cilës ka një mesazh.
“Mesazhi është që të respektohet ligji për aftësim dhe riaftësim profesional dhe punësimin e personave me aftësi të kufizuar ku të arrihet kuota, ku nga çdo 50 punëtor 1 duhet me qenë me aftësi të kufizuar dhe të arrihet edhe përtej kuotës”, ka thënë për Katror Rrustem Gashi.
Fabrika “Freesia” do të vazhdojë të jetë model i aktivizmit qytetar për shumë vjet, teksa së shpejti misionin do ta çojnë para edhe me punësime tjera të personave me Aftësi të kufizuara.
Në Kosovë vlerësohet se jetojnë mbi 200 mijë persona me aftësi të kufizuara apo rreth 10 për qind e popullsisë së përgjithshme.
Të drejtat e kësaj kategorie mbrohen edhe me ligjin për aftësimin dhe riaftësimin profesional dhe punësimin e personave me aftësi të kufizuara, i cili obligon institucionet që të punësojnë një person me Aftësi të kufizuara në çdo 50 të punësuar. /Katror.info
Edicionin #11 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
